Megapolıste qoǵamdyq kólik júrgizýshileriniń sapasyn kóterýge den qoıylmaq. Almatydaǵy 2 jarym myńnan asa avtobýs júrgizýshileri biliktilik synaǵynan ótti. Testke qaladaǵy 14 avtobýs parkiniń qyzmetkerleri qatysty. Kólik reformasy aıasynda alǵash ret qolǵa alynǵan shara júrgizýshilerdiń ımıjin kóterýge qanshalyqta áser etpek?  

Test tapsyrýǵa kelgen Rolan Bolatulynyń megapolıste qoǵamdyq kólik júrgizip júrgenine bıyl 10 jyl. Qansha jyl avtobýs tizgindep júrse de synaqqa kelgende qobaljyǵanyn jasyrmady. Jáne biliktilikti arttyryp turýǵa baǵyttalǵan bul sharany qos qoldap qoldap otyr. Óıtkeni, Almatydaı úlken qalada qoǵamdyq kólikpen júretin halyq ta, qaýip-qater de kóp.

«Qazir qala joldarynda ózgerister kóp qoı. Sonyń bárin ózimiz oqyp, kórip, qazir test ótkizip jatyrmyz. Mundaı synaqtar kerek, árıne, tek avtobýs júrgizýshileri ǵana emes jeńil kólik júrgizýshilerine de kerek dep oılaımyn», – dedi avtobýs júrgizýshisi Rolan Bolatuly.

Test 3 bloktan turady: jol erejesi, alǵashqy medısınalyq kómek kórsetý jáne kólik júrgizý mádenıeti men stresske tózimdiligin anyqtaıtyn suraqtar bar. Synaqtan súringenderdi qaıta oqytamyz deıdi mamandar. Sebebi, búgingi kúnniń júrgizýshilerine qoıylatyn talap ta joǵary. Olar tek turǵyndardy tasyp qana qoımaı, qalamyzdyń tarıhy men mádenıetinen habardar bolýy tıis. Almatyǵa qydyryp kelgen qonaqtar men týrıserge de ásem qalanyń kórikti jerlerin túsindire alýy kerek deıdi. Qazir avtobýs júrgizýshileriniń syrt kelbetine de asa mán berilýde. Jaqynda megapolıstegi qoǵamdyq kólik júrgizýshilerinde biregeı forma bolady.

«Qazir Almatyda barlyq avtobýstardyń júıeleri, tehnıkalardyń bári jańalanyp jatyr. Júrgizýshiler ártúrli jaǵdaılarǵa, oqys jaǵdaılarǵa daıyn bolýy kerek. Sondyqtan olardy oqytyp, bilimin arttyrǵan óte paıdaly dep oılaımyn», – deıdi avtokolonna basshysy Baýyrjan Darıev.

Qazirgi tańda qoǵamdyq kólik júrgizýshileriniń ımmıdjin kóterýge den qoıylmaq. Osylaısha, qala bıligi bul mamandyqqa kelgisi keletin jańa kadrlar legin qalyptastyrmaqshy. Oǵan sebep, sońǵy jyldary avtobýs parkterinde týyndap jatqan maman tapshylyǵy.  

«Myna testten keıin biz júrgizýshilerdi taǵy da qosymsha transport mamandarynyń biliktiligin arttyrý ortalyǵynda oqytamyz. Júrgizýshilerge biz óz ómirimizdi senip tapsyramyz. Biraq másele olardyń bizdi dittegen jerimizge qalaı jetkizetininde ǵoı. Jańa kadrlar kelse, jaqsy bolar edi», – dedi Almaty qalasy máslıhatynyń Eńbek, jumyspen qamtý jáne kólikti damytý jónindegi turaqty komısıanyń tóraıymy Roza Badaeva.

Testileýdiń qorytyndysy aldaǵy kúnderi daıyn bolady. Sonyń nátıjesinde mamandar kólik júrgizýshilerine arnaıy oqytý josparyn qurmaq. Almatylyq kólik mamandaryn daıarlaý ortalyǵyndaǵylar budan bylaı júrgizýshilerdi testten ótkizip, biliktiligin arttyrý jyl saıyn júrgiziledi dep otyr.

Aıta keteıik, ótken aptada ǵana qala parkterine 200 jańa avtobýs qosyldy. Al, keler jyldyń basyna deıin megapolıstegi jańalanǵan qoǵamdyq kóliktiń úlesi 87 paıyzǵa jetpek. Jáne turǵyndarǵa qolaıly bolýy úshin jyl sońynda aıaldamlarda elektrondy tablolar qoıyla bastaıdy.