Munaıdar Balmolda esimdi azamat óziniń feısbýk áleýmettik jelisindegi paraqshasynda 16 saǵat buryn mynandaı jazba jarıalapty: «Oral. Zashaǵan yqshamaýdanynda ornalasqan aıaldama. Biz jyr alyby Jambyldy kórip turmyz. Al tómendegi jazý: "Bul kúı atasy - Qurmanǵazy" dep talas týdyryp tur. Kimdiki durys, kimdiki burys? Ǵalamtordan "Jambyl Jabaev" dep izdeseńiz de, osy sýret shyǵa keledi. Qurmanǵazy atamyzdyń beınesi basqasha ǵoı. Áı, áı, áı... Biletin adamdarmen, sýretshilermen aqyldasyp alsa, qaıter edi? Asyǵystyq kúıdiredi. Men negizi óz paraǵyma keleńsizdikti jarıalaýǵa qulyqsyzbyn, mamandyǵym sýretshi bolǵasyn , bul joly shydamaı kettim -aý. Qaıteıin? Syn túzelmeı, min túzelmeıdi».
111 adam "nazar aýdarýǵa turarlyq" dep laık basqan jazbanyń astyna pikir qaldyrǵandardyń sany - 66. Solardyń ishinen biren-saranyn iriktep, nazarlaryńyzǵa usynyp otyrmyz:
Gúljan Ozyqbaeva: Qatelesip jibergen shyǵar. Bala kezden Jambyl atamyzdyń osy sýretine kózimiz úırengen. Jyr alyby Jambyldyń sýreti ǵoı. Ótkendegi Sherhan jazýshyny men Muqtar aqynmen shatastyrǵandardyń istegeni shyǵar?
Kenzhaly Mendikhanov: Bul degen bizde ıdeologıa joqtyǵyn kórsetedi. SSSR-dy jatyp alyp jamandaımyz, ol úkimettiń de jaman jaǵy da, jaqsy jaǵy da boldy, sonyń ishinde ıdeologıa máselesine qattty kóńil bólindi, balany "besiginen" bastap komýnıstik tárbıege úıretti. Sovet zamany bolsa, bir-eki bastyqtyń basy ketetin edi, bul jaǵdaıda.
Jánibek Ismýrzın:Bul sýret osy aıaldamaǵa ilingenshe qanshama qoldan ótti. Bet-beınesin kompúterge engizgennen bastap. Sonda mádenı hám rýhanı saýaty bar bir pendeniń kózine túspegeni me? Qurmanǵazy babanyń jasyn burmalaǵany az degendeı. Endi kelip, ózge emes, óz topyraǵynda istegeni mynaý...
Saǵat saıyn qyzý pikirtalasqa túsip jatqan aıaldamadaǵy beıne Jambyl Jabaev pa, Qurmanǵazy ma, osyǵan naqty jaýap alý úshin Qamshy.kz Halyqaralyq Alash syılyǵynyń laýreaty, Almaty oblysynyń qurmetti azamaty, jazýshy, jambyltanýshy Naǵashybek Qapalbekulyna qońyraý shaldy.
“Mynaý sózsiz Jambyl Jabaevtyń ózi. Osy kartınany barlyq sharada qoldanyp júrmiz. Qurmanǵazymen shatastyrýlary uıat. Qazaqtyń mańdaıyna bitken neken-saıaq asyldarynyń beınesin shatastyrý – keshirilmeıtin dúnıe» dep qysqa qaıyrdy aǵamyz.
Jambyl atamyzdyń shóberesi ,jýrnalıs Bulan Jambylmen tildestik. Ol kisi de úzildi-kesildi "Avtoryn bilmeımin, biraq bul - Jambyl" dep jaýap berdi.
İle-shala BQO ishki saıasat basqarmasynyń bólim basshysy Erbol Kóshekovke habarlastyq. "Zashaǵan" yqshamaýdanynyń óz ákimi bar. Olar bizben aqyldaspaı, osyndaı óreskel qatelik jibergen. Mundaı shatasý birinshi ret oryn alyp jatqan joq. Osyǵan deıin Salqam Jáńgir men Bókeıuly Jáńgir handy shatastyryp alǵan bolatyn. Aıaldamadan bul beıne alynyp tastaldy. Jaýaptylar túsinikteme jazady"-dedi ol..
