Syrtqy ister mınıstri Qaırat Ábdirahmanov QHR-dyń Qazaqstan Respýblıkasyndaǵy Tótenshe jáne Ókiletti Elshisi Chjan Sáony qabyldady jáne dıplomattyń qyzmetine jaqynda kirisýimen quttyqtaı otyryp, Qazaqstan men Qytaı arasyndaǵy jan-jaqty strategıalyq áriptestikti alǵa jyljytýda tabystar tiledi, dep jazady Qamshy.kz aqparat agenttigi QR SİM- niń baspasóz qyzmetine silteme jasap.
Kezdesý barysynda SHUAA etnıkalyq qazaqtardyń quqyqtary men múddelerin qorǵaýǵa baılanysty máseleler ózara senimdilik, tatý kórshilik, qurmetteý qaǵıdattary negizinde jáne strategıalyq áriptestiktiń joǵary deńgeıindegi rýhynda oń sheshiletin bolady degen ýaǵdalastyqqa qol jetkizildi.
Qazaqstan tarapy Qazaqstan azamattaryna QHR-dyń jeke, iskerlik jáne týrısik vızalaryn berýdi tez arada qaıta jalǵastyratynyna úmit bildirdi.
Kezdesý barysynda, taraptar QHR-daǵy qazaq dıasporasynyń Qazaqstan men Qytaı arasyndaǵy «dostyq kópiri» retinde sanalatynyn atap ótti.
Sonymen qatar ekijaqty saıası qatynastardyń jaı-kúıi men keleshegi, Qazaqstan men Qytaı arasyndaǵy saýda-ekonomıkalyq, mádenı-gýmanıtarlyq yntymaqtastyqtyń ózekti máseleleri, qaýipsizdik problemalary boıynsha ózara yqpaldastyq talqylandy. Ózara qyzyǵýshylyq týdyratyn qazirgi zamanǵy ózekti máselelerdiń búkil spektri boıynsha dıalogty damytýdyń mańyzdylyǵy aıryqsha atap ótildi.
Qazaqstan Prezıdenti Nursultan Nazarbaevtyń QHR-ǵa memlekettik sapary jáne onyń 2018 jyldyń maýsym aıynda SHYU Samıtine qatysýy qorytyndysy negizinde qol jetkizilgen ekijaqty kelisimderdi júzege asyrý barysyn talqylaýǵa erekshe nazar aýdaryldy.
Q. Ábdirahmanovtyń aıtýynsha, Astana men Pekın arasyndaǵy jan-jaqty tabysty yntymaqtastyq, negizinen erekshe dostyq jáne senimdi qatynastar ornatqan eki el basshylary kúsh-jigerleriniń arqasynda múmkin boldy. Sońǵy jyldary «Nurly Jol» jańa ekonomıkalyq jobasyn «Belbeý jáne jol» bastamasymen ushtastyrýmen qatar, birqatar iri ınvestısıalyq jobalar júzege asyryldy.
Qytaı Qazaqstannyń iri syrtqy saýda seriktesi. Sonymen birge Astana, Qazaqstannyń ónimderin, eń aldymen aýyl sharýashylyq ónimderin qytaı naryǵynda keńeıtýge múddeli. Osy jyldyń qyrkúıek aıynda Astana qalasynda «Belbeý jáne jol» bastamasynyń 5 jyldyq mereıtoıyna oraı 130-dan astam qytaılyq iskerlik toptar ókilderiniń qatysýymen uıymdastyrylǵan bıznes-forýmnyń nátıjesi joǵary baǵalandy. Taraptar Óndiristik qýattardy damytý baǵdarlamasyn odan ári iske asyrýǵa qyzyǵýshylyq tanytty. Búgingi kúni jalpy quny 27 mlrd. doll. quraıtyn 51 birlesken jobalar boıynsha jumys júrgizilýde, onyń ishinde jalpy quny 2,5 mlrd. doll. quraıtyn 9 joba iske qosyldy.
Osy rette, taraptar joǵary úkimettik deńgeıdegi aldaǵy josparlanǵan kezdesýlerge daıyndyq máselelerin talqylady jáne olardyń nátıjeleri eki el arasyndaǵy saýda-ekonomıkalyq jáne ınvestısıalyq qatynastardyń barlyq spektrin damytýǵa oń serpin beretinin atap ótti.
QHR Elshisi, Prezıdent N. Nazarbaevtyń Qazaqstan halqyna Joldaýynyń mazmunyn joǵary baǵalap, 2019 jyldy Jastar, týrızmdi qoldaý, Shymkent qalasynyń úlgisine sáıkes megapolısterdi damytý jyly dep jarıalaý sıaqty birqatar bastamalardy júzege asyrýǵa qytaı tarapynyń qyzyǵýshylyǵyn bildirdi.
