Qarttar aıy sheńberinde Medeý aýdany ákimdiginiń qoldaýymen qarıalarǵa qurmet kórsetildi.

Olardyń qatarynda soǵys ardagerleri, aýdannyń qurmetti azamattary jáne zeınetkerler, jalpy, 100-ge jýyq azamat bar. Shara aıasynda estrada juldyzdary men aýdan ónerpazdary áýeletip án salyp, ulttyq aspaptarmen kúı oryndady. Qazynaly qarttarǵa qýanysh syılaǵan sharaǵa aýdan ákimi qatysyp, eseli eńbekterine alǵys aıtty.  

«Medeý aýdanynyń ardagerler keńesiniń tóraǵasy bolyp saılanǵanyma 10 jyl bolyp otyr. Men kelgende Uly Otan soǵysyna qatysqan 526 aǵa-apamyz bar edi. Qazir solardyń 63-i qaldy. Meniń aıtaıyn degenim, birinshi osy kisilerdi, ásirese, Uly Otan soǵysynda tylda jumys istegen qarttardy quttyqtap, densaýlyq, balalaryna baqyt tilegim keledi. Óıtkeni, balalar baqytty bolsa, bular áli de ómir súredi. Kózderiniń tiri ýaqytynda barlyq qurmetimizdi osy aǵa-apalarymyzǵa kórsetý kerek dep oılaımyn», – dep aǵynan jaryldy Medeý aýdany Ardagerler keńesiniń tóraǵasy Kım Serikbaev.