2019 jyldan bastap eń tómengi aılyq 1,5 jarym esege ósedi. Iaǵnı, 42 500 teńge bolmaq.

Sonymen qatar, 275 myń memlekettik qyzmetkerdiń tabysy 35 paıyzǵa artady. Budan ózge, 4-shi dárejeli qyzmetkerlerdiń, ákimshilik jáne tehnıkalyq sala jumysshylarynyń jalaqylary kóteriledi. Bul týraly Almatyǵa arnaıy issaparmen kelgen senator Darıǵa Nazarbaeva almatylyq dárigerlermen kezdesýde aıtty. Jıynda sondaı-aq, Elbasynyń halyqqa joldaýy talqylandy.  

«Elbasy joldaýynda medısınalyq qyzmettiń sapasyna mán berilý kerek ekeni aıtylǵan. Sondyqtan 2019 jyldyń aqpan aıynan bastap ýchaskelik dárigerlerdiń jalaqysyn kezeń-kezeńmen 20 paıyzǵa ósirý qarastyryldy. Oǵan 5 mıllıard teńge bólinedi. Osy jyldyń sońynda pılottyq rejımdegi qaǵazdan bas tartý jobasy aıaqtalady. Almaty bul turǵyda jaqsy jumys istep keledi eken. Elektrondy júıe dárigerlerdiń de, aýrýhanaǵa kelgen adamnyń da ýaqytyn únemdep, tıimdiligin kórsetetinine senimdimin», – dedi QR Parlamenti senatynyń depýtaty Darıǵa Nazarbaeva.