2018 jylǵy 15 qarashada «Alataý» dástúrli óner teatrynyń alǵashqy qoıylymy «Jyr-jolbarys» (Jambyl. Ómir kezeńderi) kórermen nazaryna usynyldy. Qoıylymda halyq aýyz ádebıetiniń HH ǵasyrdaǵy alyby, aqyn, epık jyrshy Jambyl ómiriniń keıbir kezeńderi onyń aıtysker aqyn, el muńyn jyrlaıtyn tulǵa retinde qalyptasýy sahnalandy.
Súıinbaıdaı jyr dúldúlinen tálim alǵan Jambyl – shynaıy, taza shyndyqty kórkem sýrettegen aqyn. Jambyldy dúıim jurtqa tanytqan – onyń sýyryp salma aıtystan bastalǵan otty óleńderi edi. Jambyldyń Janys, Shybyl, Bóltirik, Qulmanbet, Shashýbaımen aıtqan aıtystary qazaq ádebıetiniń altyn qoryna endi. Sondaı-aq, qyrǵyz eliniń Toqtaǵul, Murataly, Álimqul, Balyq, Tynybek, Qataǵan sıaqty aqyndarymen de aıtysqany belgili. Sonymen qatar, Jambyl muralarynyń ishinde qyz ben jigittiń qaıym aıtysy da, túre aıtys ta, súre aıtys túrleri de bar. Osynyń qaı-qaısysynda da Jambyl óziniń naǵyz maıtalman, kesteli sózdiń sheberi ári ushqyr oıly, tapqyr sheshen ekenin dáleldegen iri tulǵa.
Pesany jazý barysynda Teatr dırektory B. Júsipov bastaǵan shyǵarmashylyq top Jambyl eline baryp, aqynnyń mýzeıin aralady. Mýzykalyq qoıylymnyń keńesshisi, Jambyldyń kózin kórgen Shashtaı aqsaqaldyń uly Jumabaı Shashtaıulymen de birneshe kezdesý ótkizip, pesanyń barysyn talqylady. Osyndaı izdenisterdiń nátıjesinde qoıýshy-rejısser Eslám Nurtazın men pesanyń avtory Ánnás Baǵdat «Jyr-jolbarys» qoıylymyna XIX ǵasyrdyń aıaǵy men XX ǵasyrdyń bastapqy kezeńindegi qoǵamnyń shıelenisken tustaryn zerdelep, zaman talabyna sáıkes úılestirip kórsete bildi. Qoıylymnyń kórkemdik deńgeıin árbir qaqtyǵystaǵy sóz astary men aqyndardyń aıtysy arqyly sharyqtaý shegine jetkizip otyrdy. Sahnanyń bezendirilýi, barymtashylyqty sýrettegendegi attardyń obrazy qazirgi zamanaýı stılde jasalǵan. Jambyl rólindegi – Áset Esjan sýyryp salma aqyn jyr alybyn joǵary deńgeıde somdaı bildi. Estrada ánderin oryndap júrgen jas akter Jambyldyń kesek-kesek oılaryn, jyrlaryn jandy daýysta sheber oryndady. Qoıylymda qazaq bı naqyshtary zamanaýı kontemporarı, folkdens bı baǵyttarymen sıntezdelip usynyldy. Sondaı-aq, dınamıkalyq senografıa qoldanýdyń nátıjesinde dramatýrgıanyń zańdylyqtary saqtalyp, horeografıa, dástúrli mýzyka men dramalyq sahnalar ózara jymdasa tústi.
Spektáklde Jambyl men Burymnyń mahabbatyna sol kezdegi qoǵamnyń ustanymdary kedergi keltiredi. Kirshiksiz sulý sezimniń tunyǵyn muń shaıqap, ashynǵan aqyn, halyqtyń aýyr turmysyn, muń-muqtajyn, el basyndaǵy aýyrtpalyqty, bolys-bıler paraqorlyǵynyń aıqyn kórinisterin qyzyl tilimen oryp, batyl synaı bildi.
Kesh qonaǵy Qazaqstannyń halyq artısi, profesor Esmuhan Nesipbaıuly Obaev zalǵa lyq toly kórermenge «Jyr-jolbarys» spektakliniń joǵary dárejede ótkendigin aıta kele, Teatr ujymyna tabys tiledi.
Nazgúl Nursaǵat,
«Alataý» dástúrli óner teatrynyń
Dástúrli ónerdi damytý jáne úılestirý bóliminiń qyzmetkeri
