Búgin Máskeý Memlekettik Lıngvısıkalyq Ýnıversıtetinde qazaq tili men mádenıet ortalyǵynyń 15 jyldyǵyna oraı saltanatty jıyn ótti.
Elbasy Nursultan Ábishuly Nazarbaevtyń tikeleı qoldaýymen qurylǵan bul mekeme osy ýaqyt aralyǵynda eki el arasynda ǵana emes, jalpy rýhanıat salasyndaǵy óziniń úlken orny men rólin dáleldedi. Qazaq tili men mádenıeti ortalyǵynyń 15 jyldyq mejeli merekesi eki eldiń yntymaqtastyǵyna eleýli úlesin qosyp otyr.
Jıynǵa kelgender aldynda sóz sóılegen Qazaqstan Respýblıkasynyń Reseı Federasıasyndaǵy Ókiletti jáne Tótenshe elshisi Imanǵalı Tasmaǵambetov halyqtar arasyndaǵy mádenı qundylyqtar urpaqtan urpaqqa til arqyly taraıtynyn aıtty. "Til-eldigimizdi tanytatyn negizgi qural, babalar ósıetin jalǵastyratyn qundylyq. Uly jazýshy jáne fılosof, Nobel syılyǵynyń laýreaty Alber Kamú bylaı aıtqan eken: «Ia, meniń týǵan jerim bar. Ol fransýz tili»",- dep óz sózin sabaqtady elshi myrza.
Sondaı-aq ol, IýNESKO uıymynyń málimeti boıynsha, 2030 jyly 20 mln. adamnan kem sóıleıtin tilder bolashaqta joıylý qaýpi bar ekenin eske salyp ótti. "Ia, tabıǵatta til men mádenıet qana emes, barlyǵy da joıylýy múmkin. Alaıda ana tildi saqtaý, árbir adamnyń basty paryzy. Azamattyń ulttyq sanasy - óz tarıhyn, mádenıetin baılanystyratyn, adamdardy uıystyratyn ózegi",-dedi Imanǵalı Tasmaǵambetov.
Osy 15 jyl ishinde qazaq tilin meńgergen 3 býyn túlep ushty. Óz kezeginde, MMLÝ rektory Irına Kraeva, osy ýaqyt aralyǵynda 50-ge jýyq azamat qazaq tilin bilip qana qoımaı, kásibı turǵyda halyqaralyq dárejede kelissózder júrgize alatyn maman bolǵanyn maqtanyshpen jetkizdi.
"Qazaq tili kóp mádenıetti til úırenýshilerdiń ortalyǵynda tolyqqandy múshesi atandy», - dedi Reseı ýnıversıtet basshysy.
Shara sońynda Qazaqstan elshisi Imanǵalı Tasmaǵambetov Ortalyqtyń ınteraktıvti tanystyrylymyn kórip, reseılik stýdenttermen qazaqsha sóılesti.
