Álemdegi eń myqty qylmystyq toptyń basshysy, esirki barony Ektor Beltran Leıva qaıtys boldy. Bul týraly Meksıka İshki ister mınıstrliginiń baspasóz hatshysy málim etti.
Jeksenbi kúni AQSH-taǵy «Áltıplano» túrmesinen jedel-járdem arqyly jergilikti aýrýhana jetkizilgen ol júrek talmasynan qaıtys boldy. Sóıtip, uzaq ýaqyt boıy Latyn Amerıkasy aýmaǵyndaǵy elder men Amerıka qurlyǵyn shýlatqan esirtki mafıasynyń serkesi ómirden ótti.
Ataqty esirtki barony Beltran Leıva 2014 jyly ustalǵanymen, ony Meksıkanyń Syrtqy ister mınıstrligi AQSH-tyń quqyq qorǵaý organdaryna tapsyrǵany belgili. «Esirtki saýdasyna qatysy bar» delinip, Amerıka abaqtasynda jazasyn ótep jatqan 56 jastaǵy azamatty dárigerler alaıda qutqaryp qala almady.
Kezinde «Qortyq» degen laqap esimmen muqym dúnıege aty málim bolǵan Hoakın Gýsman Loeranyń bandasynda jumys istegen bes aǵaıyndy jigitter Alfredo, Ektor, Artýro, Marıo jáne Karlos artynan jasyryn bólek uıym qurady. 2009 jyly qylmys áleminde aty shyqqan aǵaıyndylarǵa Meksıka aýmaǵynda eshkim betpe - bet kele almaıtyn. 2009 jyldyń aıaǵynda Meksıkanyń Kýernavaka qalasyndaǵy teńiz portyndaǵy atys kezinde bandıttik toptyń basshysy Artýro Beltran Leıva qaıtys bolady. Aǵaıyndy jigittiń taǵy bireýi ustalyp, abaqtyǵa qamalady.
Quqyq qorǵaý organdaryna bandıttik toptyń basshysyn ustaý óte qıynǵa soqty. Meksıka aýmaǵynda jasyryn jaǵdaıda Artýro Leıvanyń 49 myń jaldamaly jendeti jasyryn jaǵdaıda jumys istedi. Artýro Leıva álemdegi eń qaýipti 24 qylmystyq toptyń basynda turdy. Meksıka bıligi onyń basyna 2,1 mıllıon dollar aqsha tikti. Artýro Leıvanyń úıin 200 soldat qorshap, atys kezinde ol oqqa ushty.
Munan keıin qylmystyq toptyń basyna jeksenbi kúni júrek talmasynan qaıtys bolǵan Ektor Beltran Leıva keldi. Ol asqan qatygezdigimen kózge tústi. Kedergi jasaǵan adamdardyń barlyǵyn onyń jendetteri atyp ketetin. Sondyqtan onyń tobymen ilinisýge eshkimniń júregi daýalamady.
Ektor Beltran Leıva Ońtústik jáne Ortalyq Amerıkadan AQSH-qa geroın, kokaın, marıhýana jáne metamfetamın jáne taǵy basqa esirtki zattaryn tasydy, ony qaıtadan Eýropa qurlyǵyna jetkizýmen aınalysty. Uzaq ýaqyt boıy onyń qaıda ekenin eshkim bilmedi. Biraq Eýropa men Amerıka qurlyǵynda Beltran Leıvanyń «kóleńkeli bıznesi» buryn-sońdy bolmaǵan deńgeıde órken jaıdy. Amerıkanyń bas prokýrory tarapynan oǵan 29 aıyp taǵyldy jáne qamaýǵa alý týraly úsh ret order berildi. AQSH memlekettik departamenti ony ustap bergen adamǵa 5 mıllıon dollar berýge ýáde etti.
Aqyry ol Meksıkadaǵy meımanhanalardyń birinde tamaq iship otyrǵan jerinen ustalyp, AQSH-tyń quyq qorǵaý organdaryna berildi. Endi mine esirtki barony aýrýhanaǵa jetpeı ómirden ótti. Alaıda onyń bandasy álemde áli jumys istep jatyr.
