Búgin Parlament Májilisiniń Tóraǵasy Nurlan Nyǵmatýlın Estonıanyń Premer-Mınıstri Iýrı Ratas bastaǵan delegasıa ókilderimen kezdesti.   

Taraptar ekijaqty qarym-qatynasty nyǵaıtýdyń ózekti suraqtaryn talqylady.  

Májilis Tóraǵasy Estonıa Qazaqstannyń Baltyq aımaǵyndaǵy mańyzdy áriptesi ekenin alǵa tarta kelip, ótken jyly eki el arasynda dıplomatıalyq qatynastyń ornaǵanyna 25 jyl tolǵanyn atap ótti.

Bizdiń elimiz atalǵan memleketpen jan-jaqty ári syndarly dıalogty odan ári damytýǵa yntaly.

Májilis Tóraǵasy ásirese, Qazaqstan Prezıdenti Nursultan Nazarbaevtyń bastamasymen júzege asyrylyp jatqan «Sıfrly Qazaqstan» baǵdarlamasyna aıryqsha toqtaldy.

Osy rette Estonıanyń sıfrlandyrý, aqparattyq-kommýnıkasıalyq tehnologıa salasyndaǵy jetistikterin sóz etken N. Nyǵmatýlın osy baǵytta jan-jaqty, sonyń ishinde, zańnamalyq deńgeıde tájirıbe almasýdyń mańyzdylyǵyna erekshe kóńil bóldi.

Óz kezeginde Estonıa Premer – Mınıstri Qazaqstannyń, sonyń ishinde, Astananyń damý qarqynyna tańdanysyn jasyrmady. Sondaı-aq, bizdiń elderimizdiń ózara is-qımyly tabysty damyp kele jatqanyn aıta kelip, ekijaqty qatynasty odan ári nyǵaıtýdyń áleýeti zor ekenine toqtaldy.

Odan ári Palata Spıkeri Májilistiń zań shyǵarmashylyq jumysy jaıynda áńgimeleı kelip, parlamentaralyq baılanysty kúsheıtý máselelerine toqtaldy.