Búgin "KTK redaksıasyna bomba qoıyldy" degen aqparat taraǵanynan jurtshylyq habardar. Redaksıa jýrnalısi Dıas Nuraqynnyń aıtýynsha, qazirgi ýaqytta dúrbeleń basyldy. Respýblıka alańy ǵımaratynyń syrtyna shyqqan jýrnalıser jumys ornyna qaıta oraldy. Al Almaty qalasy İİD baspasóz jetekshisi Saltanat Ázirbek ázirge eshqandaı aqparat bergen joq.

"Jalpy elimizde qandaı da bir ǵımaratqa bomba qoıyldy" degen habar jıi taraıtyny ras. Alaıda redaksıaǵa qastandyq jasaý týraly aqparat  buǵan deıin kezdespegen. Mundaǵy maqsat ne? Jýrnalıserge qastandyq jasalýy múmkin be? Álde qasaqana jasalǵan áreket pe? Bul suraqty «Jas qazaq» gazetiniń bas redaktory, KTK telearnasy Qazaq dıreksıasynyń dırektory Sraıyl Smaıylǵa qoıyp kórdik. Jýrnalıs shyn máninde bomba qoıylǵanyna senbeıdi. Alaıda bul qońyraýdyń astarynda teris pıǵyldyń jatýy múmkin ekenin aıtady.

♦KTK redaksıasyna bomba qoıylǵandyǵy týraly qońyraý tústi

«Shynynda qoıylǵan bolsa, qandaı da bir boljam jasaýǵa bolady. Al dál qazir naqty eshteńe aıta almaımyn. Degenmen, redaksıanyń bedelin túsirý maqsatynda jasalǵan áreket bolýy da ábden múmkin», - dedi Sraıyl Smaıyl.

Iá, dál qazir qandaı da bir boljam aıtý qıyn. Alaıda el ishinde bolmasa da, álemde redaksıa ǵımaratyna jasalǵan nemese jasalmaq bolǵan qastandyqtyń túrleri kezdesip qalady. Máselen, jýyrda ǵana amerıkalyq CNN telearnasyna bomba qoıylǵany belgili, tipti jelide bombanyń sýreti de jarıalanǵan. Redaksıa ǵımaratyna qoıylǵan bombanyń sýreti Ortalyq barlaý basqarmasynyń eks- dırektory Djonn Brennannyń atyna jiberilgen. Nú-Iork ákimi Bıll De Blazıo bul jaǵdaıdy terakt jaıly jospardyń habarlanǵany dep túsindirdi. Aıtýynsha, terrorshylar BAQ-taǵy sóz bostandyǵyn joıýdy maqsat tutyp otyr.

♦"Bomba qoıyldy" degen habardy estigen jýrnalısiń áreketi jurtty tánti etti

Bir jyl buryn máskeýlik «Novaıa gazeta» basylymynyń qyzmetkerleri bomba jaıly qońyraýdyń kesirinen evakýasıalanǵan.  Alaıda eshqandaı jarylǵysh zat tabylǵan joq. Al KTK ǵımaratyna soǵylǵan qońyraýdyń astarynda ne jatyr, eger qylmysker ustalsa, bári de anyqtala jatar.