Mınskide ótetin "Balalar Evrovıdenıesi-2018" halyqaralyq baıqaýyna qatysyp, Qazaqstannyń namysyn qorǵaıtyn ánshi Danelıa Tóleshova Instagram paraqshasynda orys jáne aǵylshyn tilinde tyńdarmandaryna úndeý jasady dep jazady Qamshy.kz aqparat agenttigi.
Onlaın-daýys berý bastalardyń aldynda ol búkil álemdegi tyńdarmandaryna ózi oryndaıtyn "Ózińe sen" kompozısıasyna daýys berýdi ótindi.
Daýys berý Astana ýaqyty boıynsha 24 qarashaǵa qaraǵan túni saǵat 01.00-de ashyldy jáne 25 qarashaǵa deıin jalǵasady. 25 qarashada barlyq qatysýshy óner kórsetip bolǵannan keıin daýys berý 15 mınýtqa qaıta ashylady.
"Balalar Evrovıdenıesi-2018" halyqaralyq baıqaýynyń grand-fınaly Mınskide 25 qarashada ótedi. Astana ýaqyty boıynsha saǵat 21:00-de tikeleı translásıa bastalady, ony "Habar" telearnasy kórsetetin bolady.
12 jastaǵy Danelıa Tóleshova sahnaǵa úshinshi bolyp shyǵady, onyń aldynda shyǵatyndar - Ýkraına men Portýgalıa ánshileri. Ol "Ózińe sen" ánin qazaq jáne aǵylshyn tilderinde oryndaıdy.