Qazaqstannyń halyqaralyq naryqtaǵy básekelestigi týraly jıi aıtamyz. Biraq biz qaı orynda kelemiz? Básekelestiktiń ishine ne kiredi?

Qalaı aıtqanda da, jahandyq básekelestikke tótep berý mańyzdy.  Degenmen, ekonomıkadaǵy jyl saıynǵy ósimniń ózi turaqty emes qoı. Únemi ózgerip otyrady. Bul týraly Ulttyq ekonomıka mınıstri byltyrǵy nátıjemen salystyrǵanda, 12 faktor boıynsha ósim bar ekenin málim etti. Naqty derekke júginer bolsaq, ol qandaı ósim? Bul oraıda mınıstr Tımýr Súleımenov ınfraqurylym men  qarjylandyrý júıesi. ınstıtýttar, taýarlar men eńbek naryǵy salasy boıynsha ósimniń artqanyn jarıa etti. Aıta keteıik,  bul oraıda nátıjeli taǵy bir kórsetkish bar. Ulttyq ekonomıka mınıstriniń deregine sensek,  140 memlekettiń ishinen Qazaqstan aksıonerlerdiń quqyǵy, quqyqtyq bazanyń tutastyǵy, elektr jelisimen qamtamasyz etý salalary boıynsha kósh bastaǵan. Jeke kásip ashý múmkindigi boıynsha 7, al múddeler arasyndaǵy tartys pen daý-damaıdy sheshý turǵysynda Qazaqstan on birinshi orynda tur. Al alǵashqy tórttikte AQSH, Sıngapýr, Germanıa jáne Shveısarıa memleketteri turǵanyn aıta ketken jón.

Eskerte keteıik, Ulttyq ekonomıka mınıstrliginiń baspasóz qyzmetiniń málimetine sensek,  álem boıynsha jahandyq básekege qabilettilik ındeksi 114 kórsetkishpen túziletin kórinedi. Al oǵan shamamen jyl saıyn 140-tan astam el qatysady. Tipti  biz aıtyp otyrǵan sol 140 eldiń sanatyna kirmeı qalǵan memleketter de bolady. Demek, jahandyq básekelestikte olardyń damý ındeksi óte tómen degen sóz.

Alaıda bizge áli de basqa da nátıjeler boıynsha alǵa jyljý kerek. Oǵan senim de bar, múmkindikter de mol. Al 2018 jyldyń sońyndaǵy jahandyq básekege qabilettilik ındeksi boıynsha shyqqan qorytyndy nátıjege kóz salsaq, Qazaqstan 140 eldiń ishinde bıyl 59 orynda tur.  Demek, munyń ózi úkimettiń halyqtyń ál-aýqaty men turmysyn kóterý maqsatynda júrgizilip jatqan jumystarynyń nátıjeliligin kórsetedi.

Erkin Qaldan