Qazaq tilinde dýblájdalǵan kınofılmderdi Elimizdiń kınoteatrlarynda yńǵaıly ýaqytqa qoıýǵa baılanysty petısıa jarıalanyp, ol petitions247.com saıtynda jaryq kórdi. Petısıa avtorlary Biz Qazaqstan aýmaǵyndaǵy barlyq kınoteatrlarda qazaq tiline dýblájdalǵan kınotýyndylardy halyqqa yńǵaıly ýaqytta jáne ózge tilde kórsetiletin fılmderden kem emes jıilikte kórsetilýin talap etýde.
"Qazirgi ýaqytta kınoteatrlarda fılmderdiń qazaq tiline dýblájdalǵan seanstary prokattaǵy fılmniń 10% jetpeıdi. Sonymen qosa, qazaq tilindegi seanstar tańǵy jáne túski ýaqyttarda ǵana kórsetiledi. Bul bizdiń tutynýshy retinde aqparatty qazaq tilinde alý quqyǵymyzdy buzady.
Qazaqstan Respýblıkasynyń «Mádenıet týraly» 2006 jylǵy 15 jeltoqsandaǵy N 207 Zańynyń 28-4 babynda bylaı dep jazylǵan: 1. Qazaqstan Respýblıkasynyń aýmaǵynda barlyq fılmdi prokattaý qazaq tilinde jáne basqa da tilderde júzege asyrylady. 2. Ulttyq fılmderdi prokattaý qazaq tilinde jáne qajettigine qaraı basqa da tilderde júzege asyrylýǵa tıis.3. Shetel telearnalarynan retranslásıalanǵan fılmderdi qospaǵanda, prokattaý maqsatynda Qazaqstan Respýblıkasynyń aýmaǵyna ákelinetin (jetkiziletin) barlyq fılmderge 2012 jylǵy 1 qańtardan bastap qazaq tilinde dýbláj jasalýǵa tıis.
Sondyqtan kınoteatrlar qazaq tilindegi fılmderdi ózge tildegi seanstardan kem qoımaýǵa jáne praım taımda kórsetýge mindettelýi tıis", - delingen petısıada.
Pikir qaldyrý