Aqordada Qazaqstan Prezıdentiniń tóraǵalyq etýimen ishki ister organdary qyzmetin reformalaýǵa qatysty úlken keńes ótti. Oǵan Elbasy men tıisti mınıstrlikterdiń jetekshileri men mamandary qatysty.
Keńeste sóz alǵan memleket basshysy tıanaqty jumystardyń arqasynda elimizde, ásirese sońǵy úsh jylda qylmys deńgeıi 17,5 paıyzǵa qysqarǵanyn atap ótti.
–Adam krımınaldan qorǵaný úshin birinshi kezekte polısıaǵa júginedi. Táýelsizdik jyldary ishinde 779 qyzmetker qaza taýyp, shamamen 2,5 myńy jaraqat aldy. Muny esten shyǵarmaý kerek. Buǵan qosa, ishki ister organdarynyń aǵymdaǵy jaǵdaıy qoǵamnyń suranysyna tolyq kólemde jaýap bere almaıdy, – dedi Memleket basshysy Aqordadaǵy keńeste sóılegen sózinde.
Keńeste Prezıdent Nursultan Nazarbaev quqyq qorǵaý salasynda jumys isteıtin azamattardyń halyqpen ara qatynasy úılesimdi bolý qajettigin basa aıtty. Óıtkeni eń aldymen halyqtyń osy salada isteıtin qyzmetkerlerge senimi joıylmaýy kerek. Ol úshin polısıa zaman talabyna saı qyzmet etkeni durys. Prezıdent 5 qazanda halyqqa arnaǵan Joldaýynda da osy máseleni kóterdi. Sondyqtan da polısıa salasynyń jumysy reformalaýdy qajet etedi. Mysaly, TMD elderi keńistiginde grýzın polıseılerine degen halyqtyń senimi joǵary. Olarda jemqorlyq joq. Halyq ta polısıany qoldaıdy, senimmen qaraıdy. Al senim bar jerde quqyq qorǵaý organdary ókilderine halyqtyń tarapynan qurmet te joǵary bolady. Prezıdenttiń de osyǵan baılanysty ishki ister salasyn reformalaý jáne ony óte sapaly ári jemqorlyqsyz júıege aınaldyrý jóninde keńeste másele kótirip jatqanynyń syry da osy.
–İshki ister organdary júıesiniń qyzmeti qoǵamnyń senimin aqtaı almaıdy, azamattardyń renishin týdyrýda. Adamdar ózderin qaýipsiz sezinbeıdi. Onsyz biz qazaqstandyqtardyń joǵary ómir sapasyn qamtamasyz ete almaımyz. Al bul bizdiń baǵdarymyz sanalady. Sondyqtan polısıany reformalaý isine shuǵyl kirisýimiz qajet, - dedi Elbasy Nursultan Nazarbaev keńeste sóılegen sózinde.
Rasynda Prezıdent halyqqa arnaǵan Joldaýynda atap kórsetkendeı, polısıa qyzmetiniń sapasy joǵarylaýy kerek. Bul oraıda Elbasy atap kórsetkendeı, quqyq qorǵaý salasynyń ókilderi jumysyna tıanaqty bolsa, olardyń qyzmeti de jedel bola túsedi. Óıtkeni tosyn oqıǵa bolǵan jerge jedel jetý de qylmystyń tezirek ashylýyna yqpal etedi. Al úshin Prezıdent atap kórsetkendeı, basty maqsat – mobıldi túrde, yqshamdalǵan júıede qyzmet etý. Bul óte tıimdi. Prezıdent muny ishki ister organdary qyzmetin reformalaýǵa qatysty ótken keńeste naqty aıtty.
– Artyq nárseniń bárinen arylyp, qylmyspen kúres júrgizý jáne quqyqtyq tártipti saqtaý isine mán berý kerek. Qurylymdar ońtaılandyrylady. Sonyń nátıjesinde bir basshynyń qaramaǵynda úsheý emes, bes adam bolady. Shtat sany 10 paıyzǵa qysqarady. Osy sharalar polıseıler sanynyń 100 myń adamǵa shaqqanda 471 polıseıden kelýin 424-ke deıin tómendetýge jol ashty. Bul eýropalyq ortasha deńgeıge sáıkes keledi. Osyǵan oraı, 16 mıllıard teńge únemdeledi , – dedi Qazaqstan Prezıdenti óz sózinde.
Al únemdelgen qarajat qaıda jumsalady? Eń aldymen áleýmettik júıeni nyǵaıtýǵa jáne quqyq qorǵaý salasy ókilderiniń jalaqysyn jaqsartýǵa jumsalady. Aldyn ala belgili bolǵanyndaı, polısıa salasynda jumys isteıtinderdiń eńbekaqysyn kóterýge qosymsha 21, 4 mıllıard teńge bólinedi. Sondaı-aq aldaǵy ýaqytta atalǵan saladaǵy qyzmetkerlerdi turǵyn úımen qamtamasyz etý máseleleri de sheshiletin bolady. Negizi polısıa ókilderiniń áleýmettik jaǵdaıy jaqsaratyn bolsa, olardyń qoǵamdyq tártiptegi qyzmeti de barǵan saıyn sapalyraq bola túsedi.
Prezıdent ishki ister organdary qyzmetin reformalaýǵa qatysty keńeste óz jumysyna salǵyrt qarap, jaǵymsyz áreketke barǵan polıseıler barlyq jeńildikterinen aıyrylatynyn qadap aıtty. Demek, budan shyǵatyn qorytyndy ne? Prezıdent málim etkendeı, bizge eń aldymen búgingi qoǵamda «jańa formasıanyń polıseıleri qajet». Ol úshin kez kelgen polısıa ókili qyzmettik jaýapkershilikti aıqyn sezine alýy tıis.
Prezıdent tóraǵalyq etken keńeste polısıa ókilderiniń jańa formasy da kórsetildi.
Erkin Qaldan
