El tarıhynda alǵash ret Halyqaralyq aqparattyq tehnologıalar Ýnıversıtetiniń (MÝIT) stýdenttik IT komandasy jeti dúrkin Álem Chempıony Sankt-Peterbýrg qalasyndaǵy ulttyq zertteý aqparattyq tehnologıalar, mehanıka jáne optıka ýnıversıtetinen (ITMO) ozyp, halyqaralyq dárejede úzdikter qatarynan kórindi.
Ústimizdegi jylǵy 2 jeltoqsanda Sankt-Peterbýrg, Barnaýl, Almaty, Tbılısı qalalarynda bir ýaqytta Northern Eurasia (Soltústik Evrazıa) óńirindegi stýdenttik komandalar arasynda baǵdarlamalaý boıynsha halyqaralyq olımpıadanyń qorytyndy kezeńi ótti. Fınalǵa TMD elderiniń 318 komandasy qatysty. Quramyna Temirlan Satylhanov, Abaı Baımuqanova, Aıbar Kýanyshbaı kirgen Halyqaralyq aqparattyq tehnologıalar Ýnıversıtetiniń (MÝIT) komandasy 13 eseptiń 8-in shyǵaryp, TMD elderi arasynda júldeli 4 oryndy, Qazaqstan boıynsha 1 oryndy ıelenip, altyn medalǵa qol jetkizdi. Endigi kezekte qazaqstandyq komanda 2019 jylǵy sáýir aıynda ótetin álemdik fınalǵa joldama aldy.
«Bul ýnıversıtetimizdiń 2018 jylǵy eń úlken jeńisi. Biz mundaı kórsetkishke 6 jyl kóleminde qol jetkize almap edik. Endigi kezekte el tarıhynda alǵash ret álemdik chempıonatta úzdikter qatarynan kórinemiz degen úmit bar bizde. Bul joly Halyqaralyq aqparattyq tehnologıalar Ýnıversıtetiniń (MÝIT) stýdenttik IT komandasy jeti dúrkin Álem Chempıony Sankt-Peterbýrg qalasyndaǵy ulttyq zertteý aqparattyq tehnologıalar, mehanıka jáne optıka ýnıversıtetinen (ITMO) ozyp, halyqaralyq dárejede úzdikter qatarynan kórindi. Bul óte jaqsy kórsetkish» - deıdi Halyqaralyq aqparattyq tehnologıalar Ýnıversıtetiniń rektory Damır Shynybekov. Qorytyndy jekpe jekte 7 esepti shyǵarǵan QBTÝ komandasy da jaqsy óner kórsetip, TMD elderi boıynsha 14 oryndy ıelenip, Qazaqstan boıynsha 2 orynda turaqtady. Al, 4 esepti sheshken Nazarbaev Ýnıversıtetiniń komandasy TMD elderi boıynsha 81 oryndy, Qazaqstan boıynsha 3 oryndy ıelendi.
Endigi kezekte MÝIT komandasynyń kórsetkishteri TMD óńirinde sońǵy 5 jyldaǵy eń úzdik dep tanylyp otyr. JOO jeńisi – Qazaqstan úshin úlken jetistik, óıtkeni el tarıhynda birde bir komanda Soltústik Eýrazıa óńirinde mundaı kórsetkishke qol jetkizbegen bolatyn. Ýnıversıtet rektorynyń paımdaýynsha, «olımpıadalyq qozǵalys – daryndy jastar úshin baǵdarlamalaý boıynsha óte mańyzdy baǵyt. Olıpıada álemniń úzdik kompanıalaryna jumysqa turý barysynda stýdentter úshin taptyrmas múmkindik. Olympic Training Center túekteri men ACM ICPC qatysýshylary búgingi tańda Google, Facebook, Booking kompanıalarynda jumys isteıdi».
Olımpıadalyq qozǵalys Qazaqstanda 2000 jyldary bastalǵan bolatyn. Sol ýaqyttan beri elimiz jaqsy kórsetkishter kórsetip, jartylaı fınaldardan kórinip júrdi. MÝIT, QBTÝ, SDÝ, NÝ syndy oqý oryndarynda komandalardy halyqaralyq olımpıadalarǵa daıyndaıtyn arnaıy ortalyqtar ashyla bastady. 2012 jyly Qazaqstan-Brıtan Tehnıkalyq ýnıversıteti halyqaralyq olımpıadada 16 oryndy ıelengen kezde elimizdiń jeńiske degen alǵashqy qadamdary jasaldy. QBTÝ sol jyldary Princeton University (26 oryn) ı Carnegie Mellon University (33 oryn) syndy álemniń úzdik ýnıversıtetterinen asyp túsken bolatyn. 2014 jyly Halyqaralyq aqparattyq tehnologıalar Ýnıversıtetiniń (MÝIT) komandasy 19 orynda turaqtap, álemniń aldyńǵy qatarly Massachusetts Institute of Technology, University of Cambridge, Máskeýlik fızıka-tehnıkalyq ınstıtýt, Carnegie Mellon University syndy IT ýnıversıtetterinen ozyp, 20 úzdik komandalar qatarynan kóringen bolatyn.
