Astanalyq belsendi, tirkelmegen "Alash" halyqtyq sosıal-demokratıalyq partıasynyń jetekshisi Syrym Ábdirahmanov eki aıǵa qamaldy. Bul jaıly Azattyq tilshisine onyń advokaty Tólegen Shaıkov habarlaǵan.
♦Qazaq elinde saıası partıalar quryla ma? Ábdirahmanov nege ábigerlenip jatyr?
Onyń aıtýynsha, qazirgi kezde Astana polısıasy tórt bap boıynsha partıa jetekshisiniń ústinen qylmystyq is qozǵaǵan. Aryzdyń bireýin astanalyq sheneýnikterdiń biri túsirgen.
- Tórt bap boıynsha tergeý júrip jatyr. Bular: 274-bap, 1-bólim ("Kórineý jalǵan aqparat taratý"), 380-bap, 3-bólim, 1-pýnkt ("Bılik ókiline qatysty kúsh qoldaný"), 407-bap, 2-bólim ("Sotqa deıingi tergep-tekserý júrgizýge kedergi jasaý"), 378-bap, 1-bólim, 1-pýnkt ("Bılik ókilin qorlaý"), - deıdi Tólegen Shaıkov Azattyq tilshisine.
Astana qalalyq tergeý soty Syrym Ábdirahmanovtyń eki aıǵa qamalǵanyn rastady. Sottyń baspasóz hatshysy Botagóz Baıanovanyń aıtýynsha, qorǵaý taraby appelásıaǵa shaǵym túsirgen. Biraq sheshimniń qashan shyǵatyny belgisiz.
Áriptesteriniń aıtýynsha, jaza taǵaıyndaý boıynsha sot otyrysy 1 jeltoqsanda Astana qalalyq tergeý sotynda ótken. Biraq oǵan advokaty men qoǵamdyq qorǵaýshysynan basqa eshkimdi qatystyrtpaǵan. Partıa hatshysy Ádilet Ǵabdýlla "sottyń esh múmkindik bermesten ony birden qamap tastaǵany túsiniksiz bolyp qaldy" deıdi.
Astana qalalyq ishki ister departamentiniń baspasóz qyzmeti Ábdirahmanovqa qatysty "sotqa deıingi tergeý amaldary" júrip jatqanyn aıtyp, sál keıinirek tolyq aqparat taratatynyn aıtty.
Ábdirahmanov qamalǵan soń ınternette prezıdent Nursultan Nazarbaevqa arnap jazylǵan hat paıda boldy. Onda partıa ókilderi "jemqorlyq jaıly ashyq aıtyp júrgen" Ábdirahmanovtyń sońǵy birneshe aıda "birneshe ret zańsyz ustalǵanyn" aıtyp, "qýǵynǵa ushyraǵanyn" baıandaǵan. Hat avtorlary ony qýǵyndaýdy toqtatyp, bosatýdy talap etken.
Buǵan deıin jergilikti basylymdar Astana qalasy ákiminiń orynbasary Sergeı Horoshýnnyń Syrym Ábdirahmanovtyń ústinen polısıaǵa aryz túsirgenin habarlaǵan. Sheneýnik blogerdi ózine qatysty “jalǵan aqparat taratty” dep aıyptaǵan edi. Seısenbi kúni Astana qalalyq ákimdigine habarlasqanymyzben jaýap ala almadyq.
Qoǵamdyq pikir týǵyzatyn oqıǵalardyń ortasynda júretin Syrym Ábdirahmanov 2017 jyly "Alash" partıasynyń qurylatynyn málimdep, kópke tanymal bola bastaǵan. Ol kezde kóp adam ony "bıliktiń jasandy jobasy" dep synaǵan edi. Al Ábdirahmanov "Alash" qozǵalysy áldekimder aıyptaıtyndaı "bılik tapsyrmasymen qurylatyn partıa emes, halyqtyń ishinen shyǵatyn partıa" dep aıyptaýlardy joqqa shyǵarǵan. Nur-Otan" partıasynyń burynǵy múshesi 36 jastaǵy belsendi saıasatta "qajet bolsa, bılikpen de jumys istesý kerek" degen kózqaras ustanady.
Partıa ókilderiniń aıtýynsha, "Alash" partıasy ázirge, elde resmı túrde tirkelmegen. Onyń shamamen bes myń jaqtaýshysy bar.
