Jýyrda densaýlyq saqtaý mınıstrligi 16 jastaǵy qyzdarǵa ata-anasynyń kelisiminsiz túsik jasatýǵa ruqsat berýdi usynǵan bolatyn. Densaýlyq saqtaý mınıstri Eljan Birtanov qoǵamda qyzý talqyǵa túsken túsik jasatý máselesine qatysty túsinikteme berdi, dep habarlaıdy Qamshy.kz aqparat agenttigi Sputnik Qazaqstan saıtynyń deregin negizge alyp. 

16 jastaǵy qyzdarǵa ata-anasynyń kelisiminsiz túsik jasatýǵa ruqsat berý normasyn Halyq densaýlyǵy jáne densaýlyq saqtaý júıesi týraly kodekstiń jańa redaksıasyna engizý usynylyp otyr.  

"Menińshe, bizdiń balalarymyz 16 jasynda biraz jaýapkershilikti óz moınyna alady. Olardyń medısınalyq kómektiń kez kelgen túrin alýǵa quqyǵy bolýy kerek. Iaǵnı, qazir biz olardy barlyq jaǵynan shektep otyrmyz", — dedi mınıstr úkimet kýlýarynda. 

Birtanov qoǵam, eń aldymen, "Biz óz balalarymyzdy qanshalyqty durys tárbıelep jatyrmyz?" degen suraqty ózine qoıýy kerek deıdi.  

"Eger balalarymyz jynystyq qatynasqa túsý týraly sheshimdi bizsiz-aq qabyldap jatsa, qalǵanyna bizdiń pikirimiz qajet dep oılaısyzdar ma? Árkim osy saýaldy ózine qoıýy tıis. Talqylaý kerek, jurttyń talqylap jatqany qýantady. Áli ýaqyt bar", — dedi mınıstr. 

Ol densaýlyq týraly múlde jańa kodeks ázirlenip jatqanyn, tıisinshe túsip jatqan ıdeıalar kóp ekenin atap ótti. 

"Josparǵa sáıkes, kelesi jyldyń kókteminde biz jańa jobany tanystyrýymyz kerek. Qazir ıdeıa óte kóp, sonyń ishinde radıkaldy, máselen, qoǵamdyq oryndarda temeki tartýǵa tyıym salý, óz densaýlyǵy úshin ákimshilik jaýapkershilik engizý sekildi usynystar bar", — dedi Birtanov.