Etnıkalyq uıǵyr Mehrıgúl Tursyn úsh aı Shyńjańdaǵy saıası úırený lagerinde qamaýda bolǵan. Ol 3 aı boıy kórgen azapqa toly ómirin AQSH Kongresi aldynda aıtyp berdi dep habarlaıdy Qamshy.kz aqparat agenttigi currenttime.tv saıtynyń deregin negizge alyp. Onyń sózine súıensek, azapqa shydaı almaǵandyqtan ol qytaı sarbazdaryna «meni óltire salyńdarshy», dep jalbarynǵan.

Osydan birneshe jyl buryn Mehrıgúl Mysyr eline oqýǵa barǵan. Sol elde keıin turmysqa shyǵyp, otbasyly bolypty. 2015 jyly Qytaıǵa týǵan-týystaryn kórgisi kelip jolǵa shyǵady. Qytaıǵa barǵan kezde-aq ony belgisiz sarbazdar tutqyndap, balalarynan ajyratyp alady. Keıin onyń bir balasy qaıtys bolǵany belgili boldy. 

Qytaı bıligi 3 jyl boıy uıǵyr áıeldi elden shyǵarmaı qoıǵan. Mehrıgúl 3 ret Shyńjań lagerinde tutqynda bolǵan. Aqyrynda, Qytaıdan Mysyrǵa shyǵýǵa ruqsat etedi. Alaıda ol Qytaıǵa qaıta oralýǵa mindetti boldy. Biraq Kaırǵa kele sala Mehrıgúl amerıkalyq dıplomattarmen baılanysqa shyǵyp, AQSH-qa keledi.

«Meni terezesi joq jer astyndaǵy kameraǵa jiberdi. Túrmeniń ishindegi barlyq jaıtty baqylap otyrý úshin tórt jerge beınebaqylaý kamerasyn ornatqan. Menimen birge kamerada 60 adam boldy. Ine shanshar jer joq. Túnde uıyqtaý úshin 15 áıel turyp, qalǵandary myzǵyp alatyn edi. Osylaı 2 saǵat saıyn oryn almastyryp turdyq», dep Mehrıgúl Tursyn kózine eriksiz jas aldy.

Olar kishkene mólsherde kúrish pen sýdan turatyn tańǵy as ishetin. Sonymen birge tańǵy astyń aldynda komýnıstik partıany ulyqtaıtyn án aıtý mindettelgen.

«Olar bizge belgisiz dáriler men aq suıyqtyqty ishýge májbúrleıtin. Álgi dárilerdiń áserinen biz esimizdi joǵaltyp, talyp qalatyn edik. Al aq suıyqtyqty ishken keıbir áıelderdiń aılyq belgisi toqtap qalsa, endi birinen toqtamaı qan ketetin.  Tipti birneshe áıel azapqa shydamaı ólip ketti.

Birde meni arnaıy bólmedegi bıik oryndyqqa otyrǵyzdy. Qoldarym men aıaqtarym arnaıy lentalarǵa baılanyp turdy. Kúzetshi meniń  basyma dýlyǵa kıgizdi. Olar dýlyǵany iske qosqan kezde meniń búkil denem aýyrdy. Tipti qan tamyrlaryma deıin aýyrsynýdy sezdi. Buǵan shydaı múmkin emes. Al kórgen azabymdy sózben aıtyp jetkize almaımyn. Maǵan oılaryna kelgenin istedi. "Óz kináńdy moıynda", - dep qorlap, qysym jasady. Maǵan birde anam men balamnyń ólgenin, al ákemniń ómir boıy túrmede jatatynyn, meniń kesirimnen otbasymnyń oırany shyqqanyn aıtty. Sońǵy ret soqqyǵa jyǵyp, azaptaǵan kezde men olarǵa «meni óltire salyńdarshy», dep jalbaryndym», deıdi Mehrıkúl Tursyn.