Bul týraly «Nur Otan» partıasy Tóraǵasynyń Birinshi orynbasary óziniń Facebook-tegi paraqshasynda jazǵan.
Onda Máýlen Áshimbaev endi sanaýly kúnderden keıin eldigimizdiń boıtumaryndaı bolǵan Táýelsizdik kúnin toılaıtynymyzǵa nazar aýdaryp, bul merekeniń halqymyz úshin asa qasıetti ári qasterli ekenin aıtqan.
«Biz azattyqtyń arqasynda álemdik qaýymdastyqqa etene enip, onyń tolyq múshesi atandyq. Eshkimge jaltaqtamaı, erteńimizdi ózimiz baǵamdaıtyn, saıasatymyzdy ulttyq múddege saı júrgizetin deńgeıge jettik. Elbasymyzdyń dana basshylyǵymen táýelsizdik jyldarynda el damýynyń jańa ekonomıkalyq jáne saıası negizi qalyptasty. Halyqtyń ál-aýqaty men álemdik deńgeıdegi abyroı-bedelimiz de aıtarlyqtaı arta tústi. Sondyqtan Táýelsizdik kúnin atap ótýde Otanǵa degen mahabbattyń jarqyn úlgisin kórsetý ár qazaqstandyqtyń azamattyq boryshy bolýy tıis», – delingen jazbada.
Sonymen qatar «Nur Otan» partıasy Tóraǵasynyń Birinshi orynbasary Táýelsizdik kúnin laıyqty deńgeıde toılaý úshin memlekettik deńgeıdegi merekelik is-sharalarmen shektelmeı, ár adam az da bolsa óz úlesin qosýǵa tyrysýy qajet ekenin aıtqan.
«Osyǵan oraı barsha jeke kásipkerler men kásiporyndardy jáne halyqqa qyzmet kórsetip otyrǵan jeke uıymdardy Táýelsizdik kúnin naǵyz eldiktiń, egemendiktiń merekesi retinde atap ótýge shaqyramyz. Iaǵnı, mereke kúnderi sóreler memlekettik rámizderdiń túsimen bezendirilip, qyzmetkerler ulttyq naqyshqa saı kıimder kıse, saýda oryndarynda arnaıy aksıalar men jeńildikter sıaqty biregeı bastamalar qolǵa alynsa merekeniń mańyzy men máni odan ári arta túsetini anyq. Qalaı desek te, bul kúnderi ár qazaqstandyq merekelik kóńil-kúıge bólenip, barlyq qoǵamdyq oryndarda táýelsizdiktiń máni men mańyzy aıqyn sezilip turýy tıis. Sol kezde biz ata-babamyz ańsaǵan azattyqtyń baǵasyn paıymdap, jańa Qazaqstan tarıhyndaǵy eń ulyq kúnge degen qurmetimizdi kórseter edik», – deıdi óz jazbasynda Máýlen Áshimbaev.
Sondaı-aq ol bul bastamaǵa ár qazaqstandyq bir kisideı atsalysyp, óz úlesin qossa, Táýelsizdik kúniniń shyn máninde jalpyulttyq jáne ár qazaqstandyqtyń asyǵa kútetin eń basty merekesine aınalatynyna kámil senetinin aıtqan.
