Kez kelgen eldi ósiretin de, óshiretin de bilim. Memlekettiń myqtylyǵy onyń bilimdi azamattaryna tikeleı baılanysty. Óıtkeni, úlken ózgerister men ıgi isti jasaıtyn - adamdar. Buny zamanynda Abylaı han babamyz da: «bilekke sengen zamanda eshkimge ese bermedik, bilimge sengen zamanda qapy qalyp júrmelik» dep aıtyp ketken bolatyn. Qazaqstan táýelsizdiktiń alǵashqy jyldarynan beri osy salany kóterýge kúsh salyp keledi. Osy turǵyda kóptegen baǵdarlamalar jasalyp, jeńildikter bólindi. Jyl sanap túlektirimizge bólinetin granttardyń sany da artyp jatyr. Bilim salasyn ońtaılandyrý «Sıfrlyq Qazaqstan» memlekettik baǵdarlamasynda kózdelgen. Osyǵan oraı, elimizdiń barlyq aımaǵynda bilim salasyna qatysty sıfrlyq formatqa kóshý men ońtaılandyrý jumystary qarqyndy júrýde.
Osy sharalar Mańǵystaý oblysynda joǵary deńgeıde júzege asyrylýda. Buǵan sáıkes, smart mektepter ashylyp, sıfrlyq tehnologıalar qoldanylýda. Atap óter bolsaq, óńirdegi barlyq bilim oshaqtary arnaıy aqparattyq júıege qosylǵan. Portal «mektep.edu.kz» dep atalady. Munyń arqasynda oqýshylar men muǵalim qaýymynyń ózara qatynasy jeńildeýde. Ata-analar da balalarynyń úlgerimin ınternetten-aq kóre alatyn deńgeıge jetti. Osyndaı aqparattyq júıeler ekonomıkalyq turǵydan tıimdi me degen saýalǵa keler bolsaq, mektepke deıingi mekemelerde kezekke turýdy avtomattandyrý prosesi kóptegen oń ózgeristerge bastaıdy. Birinshiden, keńse taýarlaryna ketetin qarjylyq shyǵyndar qysqarady (1 mln. 500 myń teńgege deıin). Ekinshiden, balabaqshaǵa turý prosesi jeńildetiledi. Al aqparattyq júıeler bolsa qaǵazdardy únemdeýge, ata-analardyń ýaqyttaryn tıimdi jumsaýǵa yqpal etedi. Atap aıtar bolsaq, «mektep.edu.kz» aqparattyq portalyn engizý búdjet shyǵynyn 8,5 mln-ǵa qysqartsa, kestege (tabel) ketetin shyǵyndy 4,1 mln-ǵa únemdeıdi eken.
Mańǵystaý oblysy bilim salasynda oryn alyp jatqan taǵy jańashyldyqtardyń biri – «e-kolledj» jobasy. Bul bilim alýshylar men bilim berýshilerdiń ómirin jeńildetýge baǵyttalǵan. Búginde aımaqtaǵy 26 kolejge joba engizildi. Aıtýly baǵdarlama ekonomıkalyq turǵydan da óte tıimdi – búdjet shyǵyndary 3 mln-ǵa qysqarady.
Kóp jyldar boıy júrgizilgen zertteýler men álemdik tájirıbe sıfrlandyrýdyń osy salaǵa kóp paıdasyn tıgizetinin rastady. Osy rette, IT-mamandarynyń alar orny orasan. Inovasıany ıgergen mundaı biliktiler bilim berý salasyndaǵy kóp kederginiń túıinin sheshýge atsalysatyn bolady. Bul turǵyda elimizdiń jetekshi partıasy – «Nur Otan» partıasynyń «balalarǵa arnalǵan tegin IT-cynyptar» atty jobasy bar. Atalmysh joba kıeli meken Mańǵystaýda da oryndalyp jatyr. Qazirgi kórsetkishterge súıensek, 34 IT-cynyby ashylypty. Aıta keter bolsaq, bıylǵy jylǵa 35 IT-cynybyn ashý josparlanǵan bolatyn. Qalada – 17-sin, aýyldyq eldi mekende – 18-in ashý kózdelgen. Sondaı-aq, óńirdegi 134 mekteptiń 112-si Wi-Fi-men qamtamasyz etilgen.
