Almatyda temirjol boıymen estakada arqyly Nazarbaev dańǵylyn Jansúgirov kóshesine deıin úńgileý jumystary aıaqtaldy. Jumys sapary barysynda Almaty ákimi Baýyrjan Baıbek «soltústik-ońtústik» baǵyty boıynsha Seıfýllın dańǵylynyń júktemesin azaıtatyn jańa jol aıryǵyn kórdi.

Tehnıkalyq jaǵynan kúrdeli jobanyń jalpy quny 7,4 mlrd. teńge, ol eki jyl boıyna salyndy, qurylys kezinde 500-den astam jańa jumys orny quryldy. Úńgileýdiń ótkizý qabileti táýligine 48 myń kólik.

Tirek qondyrǵylary men qabyrǵalary men estakada qurylystary úshin 7 myń tekshe metr beton jáne 4 myń tonnadan astam metalokonstrýksıa paıdalanyldy.

Qala ákimi Baýyrjan Baıbek jaıaý júrginshi ınfraqurylymyn qurý jáne qoǵamdyq kólikti damytýmen qatar qalada avtomobılısterdiń jaǵdaıyn jaqsartý da qolǵa alynǵanyn aıtty. Jol aıryqtary salynýda, joldar jóndelýde, birjaqty qozǵalys engizilýde, adamdardyń ekpini artyp, bıznestiń logıstıkalyq shyǵyny tómendeýde.

Jumys sapary kezinde megapolıs basshysy qalanyń damýyna úles qosqan jumysshylarǵa eren eńbekteri úshin alǵys aıtty.

«Prezıdentimizdiń saıasaty arqasynda Almaty turaqty damýda, ekonomıkalyq jaǵynan ósýde. Sońǵy on jyl ishinde 30 jol aıryǵy ashyldy, jańa úıler salynýda, qalanyń tarıhı ortalyǵy jańarýda, bıznes órken jaıýda. Mine, munda sizderdiń úlesterińiz aıtarlyqtaı, atqarylǵan isterdiń barlyǵy jumysshylar eńbeginiń nátıjesi. Jańa jol aıryǵy Tuńǵysh Prezıdent kúni qarsańynda qala turǵyndaryna jasalǵan úlken syılyq», - dedi Baýyrjan Baıbek.

Aıta keterligi, uzyndyǵy 800 metr bolatyn estakadamen kólik qozǵalysy búginnen bastaldy. Qozǵalys bóliginiń eki jaǵynda trotýarlar bar, energıa jınaqtaýshy shamdary bar jaryq baǵanalary ornatylǵan. Shyǵý satylaryn jáne aınalany abattandyrý jumystary jalǵasýda.