Almatyda Tuńǵysh Prezıdent kúniniń qarsańynda kópfýnksıonaldy «Jarys Arena» sport kesheni ashyldy. Joba demeýshiler qarjysy esebinen júzege asty, keshen Orbıta-3 yqsham aýdanyndaǵy №40 jalpy bilim beretin mektep aýmaǵyna ornalasqan.

Memleket basshysy Qazaqstan halqyna Joldaýynda buqaralyq sportty damytýǵa jáne kem degende 100 deneshynyqtyrý-saýyqtyrý keshenderin salý qajettigine nazar aýdarǵan edi.

El Prezıdenti qoıǵan mindetterdi oryndaý maqsatynda Almatyda qalanyń ınfraqurylymyn modernızasıalaý, sport ortalyqtary men alańdaryn rekonstrýksıalaý jáne ashý jumystary belsendi túrde júrýde. Osy rette memlekettik-jeke áriptestik aıasynda iske asatyn jobalarǵa aıryqsha mán berilýde. Óz kezeginde kópfýnksıonaldy «Jarys Arena» sport kesheni Memleket basshysy Joldaýyn júzege asyrý aıasyndaǵy alǵashqy obekt bolyp tabylady.

«Bizdiń Prezıdentimiz Nursultan Nazarbaev buqaralyq sportty jáne elimizdiń sporttyq ınfraqurylymyn damytýǵa turaqty nazar aýdarýda. Ózderińiz kórgendeı, jeke sektor memlekettiń qoldaýy barysynda úlken jumystardy atqarýda, sonyń arqasynda bizdiń balalarymyz sportpen shuǵyldanyp, salaýatty ómir saltyn qalyptastyrýda tamasha múmkindikterge qol jetkizip otyr. Ýaqyttan tys kezderi munda jaqyn ornalasqan aýdandar turǵyndary da sportpen aınalysa alady», - dep atap ótti Almaty ákimi Baýyrjan Baıbek.