Almatyda kólik reformasy aıasynda jyljymaly sostavty jańartý odan ári jalǵasýda. Jumys sapary kezinde Almaty ákimi Baýyrjan Baıbek búgin BRT jelisine jańa baǵyttar boıynsha shyǵatyn syıymdylyǵy joǵary 18 metrli avtobýstardy kórdi.

Jolaýshylar aǵynynyń artýyna oraı BRT jelisinde №205 jańa baǵyt ashyldy, mundaǵy kólik Mustafın – Rysqulbekov – Súleımenov – Jandosov – Tımırázev – Jeltoqsan (keri baǵytta Naýryzbaı batyr) - Tóle bı kóshelerin, Shyǵys aınalma jolyn jáne «Jetisý» bazaryn qamtıdy.

Bul baǵyt boıynsha qyzmet kórsetý úshin 30 jańa kólik birligi uıymdastyrylǵan, qozǵalys ıntervaly 5 mınýt. Tómen edendi avtobýstardyń syıymdylyǵy 180 adamnan asady, kólikter kondısıonerlermen, vıdeobaqylaý kameralarymen, eńkeıgish kýzovpen jabdyqtalǵan ári ekologıalyq Evro-5 synybyna saı. 18 metrli avtobýstyń tórt esiginiń árqaısysyna «OŃAI» termınaly ornatylǵan.

«Qala basshylyǵynyń qoǵamdyq kóliktegi servıs sapasyn arttyrýǵa qatysty tapsyrmasyna oraı qazirdiń ózinde 600 júrgizýshi biliktilik Ortalyǵynda kásibı sheberlikterin jetildirýde. PDD jáne kúızelistiń aldyn alý, alǵashqy medısınalyq kómek kórsetý, jolaýshylarǵa mádenıetti qyzmet kórsetý boıynsha trenıńter ótýde», - dedi Almaty qalasy ákiminiń orynbasary Erlan Áýkenov.

Qalanyń Kólik holdıńiniń basshysy Sadır Hamraevtyń aqparaty boıynsha ótken qazan aıynda «OŃAI» kartasy boıynsha 1,9 mlrd. teńgeniń 31 mıllıony tranzaksıalanǵan, bul rekordtyq kórsetkish.

Aıta keterligi, jyl aıaǵyna deıin Almatyda qoǵamdyq kóliktiń úlesi 87 paıyzǵa jetetin bolady. Ótken aptada qalaǵa taǵy 200 jańa avtobýs keldi.