Almaty ákimdiginde mektep dırektorlarymen keńes ótti, onda bilim júıesindegi sybaılas jemqorlyqqa qarsy is-qımyl máseleleri talqylandy.
Kezdesýdi ashqan Almaty qalasy ákiminiń orynbasary Arman Qyryqbaev Memleket basshysynyń bilim júıesine aıryqsha nazar aýdaratynyn, bul máseleniń halyqqa Joldaýynda aıqyn kórinis tapqanyn atap ótti. Bilim salasyn qarjylandyrý jyl ótken saıyn arta túsýde. Almatyda tek sońǵy 5 jyl ishinde ǵana bilim salasyn qarjylandyrý 27 mlrd. teńgege ósken.
Almatyda mektep jasyna deıingi jáne jalpy orta bilim berýdiń sapasyn kúsheıtý maqsatynda jyl aıaǵyna deıin bilim júıesi qyzmetkerleriniń biliktiligin arttyrýǵa jáne PIZA, SAT, AST syndy halyqaralyq standarttarǵa kóshýde biryńǵaı kásibı talaptar engizýge qatysty sharalar jospary bekitiledi. Memleket basshysy tapsyrmalaryn oryndaý aıasynda eldi mekenderdi damytý josparlary mektep salý syzbalarymen úndesedi, sonyń arqasynda jeke ınvestısıalar esebinen mektep qurylystarynyń qarqyny artatyn bolady.
Degenmen, Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty qalasy boıynsha Departamentiniń dırektory Danıar Taýmurat óziniń sózinde bilim salasynda sybaılas jemqorlyqqa qarsy is-qımyldy belsendi túrde júzege asyrý qajettigin atap ótti.
«Qazirdiń ózinde jurtshylyq mektepti jóndeý, tazalaý nemese basqa da sharalarǵa aqsha jınaý faktileriniń oryn alatyny týraly habarlap jatady. Biz mundaı isterge ata-analar shyǵyndanbaýlary tıis degen senimdemiz, óıtkeni barlyq qajettilikter úshin búdjetten jetkilikti qarjy bólinedi. Sybaılastyqqa qarsy kúrestiń utymdy joly – sıfrlandyrý, munda memlekettik qyzmet kórsetý prosesinde sheshim qabyldaý úshin adamı faktor joıylady. Bilim basqarmasy memlekettik qyzmetterdi avtomattandyrýda, ótken jyldan bastap «Almaty mektep» baǵdarlamasy jumys isteı bastady, bıylǵy jyly bala baqshalarǵa kezekke qoıý baǵdarlamasy qolǵa alynady», - dedi Danıar Taýmurat.
Ol mektepterde aqsha jınaýǵa qatysty aqparattardyń barynsha tekseriletinin, eger ondaı keleńsizdikter rastalatyn bolsa tıisti quqyqtyq baǵa beriletinin aıtty. Aqsha jınaý faktilerine kináli jandarǵa qatań sharalar qoldanylady, tipti sybaılastyqqa qarsy kúres zańnamasyna saı qylmystyq is qozǵalýy múmkin.
«Pedagogtardyń basty mindeti – balalardy oqytý men tárbıeleý. Qazirgi kezde ata-analardan oqý oryndaryn jóndeýge, túrli zattar alýǵa qatysty aqsha jınaýǵa esh negiz joq. Ókinishtisi, keıbireýler ózderiniń memlekettik sektorda qyzmet etetinin umytyp ketetin sıaqty. Memlekettik bilim mekemelerine tıesiliniń barlyǵy – memlekettiń menshigi, ıaǵnı salyq tóleýshilerdiki», - dedi qalanyń Bilim basqarmasynyń basshysy Gúlnar Qojabergenova.
Ol óziniń sózinde jyl saıyn Bilim basqarmasy aqsha jınaýǵa jol bermeý maqsatynda ár mektepke «Bilim mekemelerinde aqsha jınaýǵa tıym salynǵany týraly» hat jiberiletinin, ony oryndaý qaladaǵy bilim uıymdarynyń birinshi basshylaryna júkteletinin aıtty. Tek 2018 jyly 7 mektep dırektorlary qyzmetterinen bosatylǵan.
