Almatyda jaıly qala keńistigin qalyptastyrý barysynda jańarǵan dańǵyldarǵa birden birneshe jańa fontandar salyndy. Tipti, qalanyń tarıhı ortalyǵyn rekonstrýksıalaý kezinde «umyt qalǵan» almatylyq sýburqaqtar jóndelip, iske qosyldy.

Mysaly, QTJ ǵımaratynyń aldyndaǵy burynǵy kólik turaǵynyń ornyna jańa fontan paıda boldy. Nazarbaev dańǵyly boıynda birneshe jańa ári qurǵaq sýburqaqtar iske qosyldy.

Abaı dańǵyly boıyndaǵy jańa fontandar da kópshiliktiń kóńilinen shyǵady, onyń ishinde Sport jáne týrızm akademıasy men Túrksib aýrýhanasynyń burynǵy úıi aldyndaǵy fontandar kóz tartatyn bolady.

Ulttyq kitaphana men Baıseıitova kóshesi arasyndaǵy fontan qurylysy aıaqtaldy. Lermontov atyndaǵy akademıalyq orys drama teatry aldyndaǵy fontan jóndeldi.

Respýblıka Saraıy aldyndaǵy Abaı alańynda birden birneshe jańa fontandar jumys isteı bastady.

Abylaı han dańǵyly Shevchenko men Qarasaı batyr kósheleriniń qıylysyndaǵy eski fontandar rekonstrýksıalandy. Qurmanǵazy atyndaǵy konservatorıa aldyna jańa fontan salyndy. Bulardan ózge, Almaty-2 temirjol vokzalynyń mańaıynda qurǵaq fontandar paıda boldy.

Rekonstrýksıadan ótken Ortalyq saıabaqtyń shyǵys jaǵynda jazǵy sahna mańyna alma aǵashy beınesindegi túrli boıaýmen aıshyqtalǵan jańa fontan anadaıdan kóz tartady. Munda 10 jyl boıy bos turǵan sýburqaq jóndelip, iske qosyldy.

Jańa fontandar salý men eskilerin jóndeý kezinde qaıtarma sýmen qamtamasyz etetin ári túri pishindi, sý qarqynyn, galogendi shamdar beretin túrli tústi jaryq kózderin basqaratyn ozyq tehnologıalar qoldanyldy.

Qysqy maýsymda ınjenerlik komýnıkasıalar qatyp qalmaýy úshin barlyq fontandar durys bekitildi.

Aıta keterligi, Almatyda qazirdiń ózinde tarıhı ortalyqtyń 60 paıyzdan astamy jańardy, 524 kóshe, 1400 eski aýla jańardy. 300 km aryq salyndy jáne jóndeldi, 800 km ınjenerlik jeli tartyldy.

Jyl aıaǵyna deıin barlyq kóshe jaryqtarynyń úshten biri jaryq dıodty jáne energıa jınaqtaýshy shamdarǵa aýystyrylady, al jańa qoǵamdyq kóliktiń úlesi 87%-ǵa deıin jetedi.