«Nur Otan» partıasyna Almatynyń jas turǵyndary múshelikke alyndy. Olardyń qatarynda Olımpıada chempıondary, dárigerler, ǵalymdar men jýrnalıser bar.

Partıanyń jańa músheleri qalanyń damýy úshin, judyryqtaı jumylyp jumys isteýge nıetti etken. Búgin qala ákimi Baýyrjan Baıbek jastardyń qolyna partıalyq bıletteri men tıisti sertıfıkattaryn tabystady.

«Nur Otan» partıasy bıleýshi partıa retinde kóp jumys atqaryp kele jatyr. Elbasy – bizdiń partıamyzdyń lıderi. Kelesi jyly partıanyń 20 jyldyǵyn atap ótetin bolamyz. «Nur Otan» partıasynyń maqsaty – Táýelsizdigimizdi nyǵaıtý, halyqty biriktirý, damyǵan memleketterdiń arasyna ený úshin jumys isteý. Ol úshin barlyǵymyz berik bolýymyz kerek, tutas bolýymyz kerek. Sondyqtan el abyroıyn asqaqtatyp júrgen sizderge úlken úmit arta otyryp, Elbasy saıasatyn iske asyrýshy partıa múshesi bolatyndaryńyzǵa senim bildiremiz», – dedi Almaty qalasynyń ákimi Baýyrjan Baıbek.

Saltanatty jıyn kezinde shahar basshysy «Nur Otan» partıasynyń jańartylǵan fılıalymen tanysty. Jańa keńse jóndeýden soń turǵyndarǵa barynsha yńǵaıly bolǵan. Jyl saıyn partıanyń keńsesine 10 myńnan astam adam kelip, tıisti kómek pen keńes alady. Halyqqa yńǵaıly bolý úshin munda elektrondyq úkimet termınaldary qoıylǵan. Endi partıanyń jańa músheleri de uıymnyń jumysyn jetildirýge óz úlesterin qosady.

«Búgin Elbasymyz basqaryp otyrǵan partıaǵa qosylý úlken mártebe boldy. Men bul úlken jaýapkershilik ekenin sezinip otyrmyn. Sebebi, «Nur Otan» partıasy bizdiń elimizdiń patrıot kúshi. Ol ár kezde «Jasulan», «Jas qyran» syndy jastar uıymymen, «Jas otan» birlestigimen jumys istep, sondaı-aq ardagerlerdi qoldap keledi. Sol sebepti, bul men úshin úlken jaýapkershilik jáne mártebe», – dedi «Nur Otan» partıasynyń múshesi, jýrnalıs Oksana Dracheva.