10 jyl ishinde shaharymyzǵa 22,2 mlrd dollar ınvestısıa tartyldy. Bıylǵy jyly ınvestısıa kólemi 25%, sonyń ishinde sheteldik ınvestısıalar 24% artty. Bul týraly Almaty qalasynyń ákimi Baýyrjan Baıbek «Almaty Invest» halyqaralyq forýmynda aıtty.

Osymen 6 ret ótkizilip otyrǵan bul forýmǵa elimizden jáne shetelden myńnan asa delegat qatysýda. Jıynnyń ashylýy barysynda sóz sóılegen Baýyrjan Baıbek, Almaty qalasynyń bıznes jasaýǵa óte yńǵaıly ekendigin aıta kele, shahardyń múmkindikterine toqtalyp ótti.

«Almaty ekonomıkasy 35 mlrd dollardy quraıtyn Ortalyq Azıadaǵy eń damyǵan megapolısterdiń biri. Qaladaǵy alpy óńirlik ónim jan basyna shaqqanda 20 myń dollardy quraıdy. Qalamyzǵa halyqaralyq kompanıalar ınvestısıany belsendi quıýda. Elbasynyń sarabdal saıasatynyń arqasynda Táýelsizdik jyldarynda megapolıs ekonomıkasy 100 esege, halyq tabysy 20 esege artty. Búgingi kúni qala ekonomıkasynyń 86% saýda jáne qyzmet kórsetý quraıdy. Shaǵyn jáne orta bıznestiń úlesi 40%, ıaǵnı Almatyda munaıdan táýelsiz turaqty ekonomıka qalyptasqan», – dedi shahar ákimi.

Sondaı-aq ol, osyǵan deıingi forýmdar aıasynda jalpy somasy 1 mlrd dollardy quraıtyn 40-tan astam memorandýmǵa qol qoıylǵanyn jáne qazirge deıin jalpy quny 400 mln quraıtyn 12 joba iske asyp jatqanyn aıtyp ótti.

«Almaty myń jyldyq tarıhy bar shahar. Uly Jibek joly boıyndaǵy eń iri naryq. Almaty ómir súrý men bıznes júrgizýge qolaıly qala. Búginniń ózinde qala ekonomıkasyndaǵy memlekettik úlesi 2,4%. Munda elimizdegi iri salyq tóleýshi kompanıalardyń úshten biri ornalasqan, 30-dan astam Trans ulttyq kompanıa, birlesken kásiporyndardyń 43% jáne iri halyqaralyq uıymdar bar», – dedi Baýyrjan Baıbek.