Almatyda qazaqtyń áıgili kompozıtory Myńjasar Mańǵytaevqa arnap memorıaldy taqta ashyldy. Ol kompozıtordyń 30 jylǵa jýyq ózi turǵan úıiniń qabyrǵasyna ornatyldy.  Myńjasar Mańǵytaev «Qozy men Baıan» baletine, «Aqsaq qulan», «Jaılaýda», «Qarataý áýenderi» sıaqty horǵa arnalǵan poemalarynda erekshe iz qaldyrǵan. Sondaı-aq, kóptegen spektáklder men múltfılmderge mýzyka jazǵan. 

«Ásem kósheniń boıynda ornalasqan Kompozıtorlar úıiniń ishi tolǵan qudyret edi ǵoı. Nebir talantty, qudiretti kompozıtorlarymyz, babalarymyz, ataqty kisilerdiń barlyǵy osy jerde turǵan. Myńjasar aǵamyz da solardyń bel ortasynda turdy. Búgingi shara úshin qalalyq ákimdikke raqmet aıtqym keledi. Bul da sazger esimin tarıhta qaldyrýdyń jaqsy bir belgisi», – dedi Qazaqstannyń halyq ártisi, Memlekettik syılyqtyń laýreaty Sábıt Orazaev.