Almaty máslıhatynyń kezekti sesıasynda qala búdjeti qaıta qaralyp, únemdelgen qarajat mańyzdy baǵyttarǵa qaıta bólindi.

«Búdjetti naqtylaý sheńberinde birqatar mańyzdy áleýmettik jobalarǵa basymdyq berý qarastyrylǵan. Respýblıkalyq búdjetten Almatyǵa qosymsha 10,8 mlrd teńge bólindi. Bul qarajat Abaı dańǵylyn uńǵylaýǵa, Rysqulov pen Qulja jolaıryǵynyń qurylysyn aıaqtaýǵa, 2021 jylǵa taman metro stansasyn paıdalanýǵa berýge, elektr poıyzdaryn satyp alýǵa baǵyttalady», - dedi qalalyq ekonomıka jáne búdjettik josparlaý basqarmasynyń basshysy İlıas Óserov.

Onyń aıtýynsha, memlekettik tapsyrysty júzege asyrýdan, shyǵyndardy ońtaılandyrýdan ájeptáýir qarjy únemdelgen. Bul qarjy qala ekonomıkasyn ınvestısıalaýǵa qaıta salynady. Al áleýmettik salaǵa 611,7 mln teńge jumsalady.

«Áleýmettik turǵydan az qamtylǵan otbasylardy qoldaýǵa qosymsha 42,4 mln teńge, úıden oqytylyp jatqan 676 múgedek balaǵa materıaldyq kómek retinde 6 mln teńge qarastyrylady. Oqýshylar qatarynyń kóbeıýine baılanysty 260 mln teńgeden asa qarjy muǵalimder jalaqysyn kóterýge bólinedi. Shańyraq shaǵynaýdanynda 320 oryndyq balabaqsha qurylysyna qosymsha 528 mln teńge bólinedi. Sonymen qatar, balabaqshalarda memlekettik tapsyrys 60 balaǵa artady. Oǵan 5,6 mln teńge qaralyp otyr. 7-9 jeltoqsan arasynda short-trek boıynsha álem kýbogyn ótkizýge 19,2 mln teńge jumsalady», - dedi qalalyq ekonomıka jáne búdjettik josparlaý basqarmasynyń basshysy İlıas Óserov.

Sonymen qatar, mádenı sharalardy ótkizýge 281,3 mln teńge baǵyttalady. Sesıaǵa qatysqan depýtattar búdjet naqtylaýyn biraýyzdan qoldady. Osylaısha Almaty búdjeti 537,5 mlrd teńge bolmaq. Onyń ishinde naqty búdjet  - 434,6 mlrd teńge.

Eske sala keteıik, Almatydaǵy qalalyq sot ǵımaratynyń qurylysyna 1 mlrd teńge bólinetinin jazǵan bolatynbyz.