Almaty qalasynyń máslıhaty áleýmettik salaǵa qosymsha 611 mıllıon teńge bóletin boldy. Búgin ótken kezekti sesıada qala búdjeti qaıta qaralyp, únemdelgen qarajatty áleýmettik mańyzy bar salalar men jobalarǵa bólý týraly sheshim qabyldandy.

«Áleýmettik turǵydan az qamtylǵan otbasylardy qoldaýǵa qosymsha 42 mln teńge, úıden oqytylatyn 676 múgedek balaǵa materıaldyq kómek retinde 6 mln teńge qarastyrylady. Oqýshylar qatarynyń kóbeıýine baılanysty 260 mln teńgeden asa qarjy muǵalimder jalaqysyn kóterýge bólinbek. Sonymen qatar, Shańyraq shaǵynaýdanynda 320 oryndyq balabaqsha qurylysyna qosymsha 528 mln teńge qarastyrylǵan», – dedi Almaty qalasy Ekonomıka jáne búdjettik josparlaý basqarmasynyń basshysy İlıas Óserov.

Jol jáne kólik ınfraqurylymyn damytýǵa 4 mlrd 4 mln teńge qosymsha bólinedi. Bul qarjynyń 2 mlrd teńgeden astamy ishki áleýmettik mańyzy bar avtobýs tasymalyna jumsalmaq. «Dostyq» pen «Saryarqa» metro stansalarynyń qurylysyn aıaqtaýǵa jergilikti búdjetten 1 mlrd teńge qosymsha qarastyrylady. Sonymen qatar, Úlken Almaty aınalma jolynyń qurylysy jalǵasatyn bolady.  

«Respýblıkalyq búdjetten Almatyǵa qosymsha 10 mlrd 8 mln teńge bólindi. Bul qarajat Abaı dańǵylyn uńǵylaýǵa, Rysqulov pen Qulja jolaıryǵynyń qurylysyn aıaqtaýǵa, 2021 jylǵa qaraı metro stansasyn paıdalanýǵa berýge jáne elektr poıyzdaryn satyp alýǵa baǵyttalady», – dedi İlıas Óserov.

Kólik ınfraqurylymyn damytýmen qatar, aǵymdaǵy jyly qalany abattandyrýǵa 372 mln teńge al, turǵyn-úı komýnaldyq sharýashylyǵyn jaqsartýǵa qosymsha 694 mln teńge baǵyttalmaq. Sondaı-aq, qalalyq sot ǵımaratynyń qurylysyn jalǵastyrý úshin 1 mlrd teńge jumsalady. Sesıaǵa qatysqan máslıhat depýtattary búdjet naqtylaýyn biraýyzdan qoldady. Osylaısha, Almaty búdjeti 537 mlrd teńgeni qurap otyr. Onyń ishinde naqty qolda bar qarjy – 434 mlrd teńge.