Qazaqstanda Buqaralyq aqparat quraldary týraly jańa zań qabyldanady. Sebebi, 19 jyl boıy qoldanylyp kelgen mańyzdy qujat eskirip, qazirgi zaman talaptaryna jaýap bere almaı otyr.

Bul týraly Almatyda ótken Hİ Respýblıkalyq medıaquryltaıda BAQ salasyndaǵy memlekettik saıasatty júrgizý departamentiniń dırektory Bekzat Rahımov málimdedi. Ázirge onyń mazmuny men ondaǵy negizgi baǵyttar áli belgisiz. Tek ǵalamtor betterindegi aqparattarǵa baqylaý kúsheıedi. Búgingi basqosýda qazaq tilindegi BAQ-ty damytý máselesine de erekshe kóńil aýdaryldy.

«Memlekettik tildegi kontenttiń qalyptasýy qazir jyldam damyp keledi. Memlekettik tapsyrys arqyly da bul salaǵa erekshe kóńil bólinýde. Kórermen retinde, aqparatty tutynýshy retinde qazaq tildi BAQ ózge salalarmen básekege túse alady dep oılaımyn», – dedi QR AKM BAQ salasyndaǵy Memlekettik saıasat departamentiniń dırektory Bekzat Raqymov.

Al keler jyly Qazaqstanda barlyq memlekettik organ úshin biryńǵaı saıt iske qosylady eken. Aldymen 396 saıt jabylyp, memlekettik organdardyń aqparattyq resýrstary gov.kz platformasyna kóshedi. Onda quqyqtyq norma aktileri men júrgizilip jatqan saıasat týraly aqparattar jınalady. Al sıfrlandyrý dáýirindegi jańalyqtar, ǵalamtordyń múmkindigi qazaqstandyq medıa naryqty teris emes, kerisinshe ony kóterýge serpin beredi deıdi sarapshy.

«Meniń oıymsha, aqparattyq, sandyq tehnologıalar teledıdardyń áleýetin arttyrady. Onyń álemdik deńgeıge shyǵýyna kómektesedi. Mysaly, «Almaty» telearnasyn kórý úshin buryn tek Almatynyń nemese Qazaqstannyń turǵyny bolý kerek bolatyn bolsa, qazir ınternettiń arqasynda Antarktıdanyń ózinde otyryp alyp, onlaın formatta bolsyn, YouTube kanalynan bolsyn, «Almaty» arnasyn kóre berýge bolady. Másele tek sol kanalda júrgen, arnada júrgen azamattardyń soǵan beıim bolýy, osyndaı jaqsy múmkindikterdi paıdalanýynda ǵana», – dedi saıasattanýshy Aıdos Sarym.