Fransıa prezıdenti halyqtyń ál-aýqatynyń tómendep ketýin úkimetten nemese halyqtyń ózinen kórgen joq. Bar jaýapkershilikti óz moınyna aldy.
Prezıdenti Emmanýel Makron jappaı narazylyq aksıalaryna baılanysty teledıdar arqyly málimdeme jasady. Halyq aldynda sóılegen Makron úkimetke birneshe tapsyrma berdi. Alǵashqysy, qańtardan bastap eń tómengi jalaqyny 100 eýroǵa kóbeıtý, ári qyzmet ýaqytynan tys jumys istegenderge salyq salmaý.
Sonymen qatar, prezıdent tómen jalaqy alatyndar men zeınetkerlerge salyq salmaǵyn salmaýǵa ýáde etti.
Makron «sary jılettegi» sherýshilerdiń narazylyǵyn eskerip, fransýzdardyń ál-aýqatynyń tómendep ketýiniń jaýapkershiligin óz moınyna aldy. Alaıda polıseılerge shabýyl jasaǵandardy qatań synady.
7 qarashadan beri fransýzdar kúndiz kúlkiden, túnde tátti tynysh uıqylarynan aıyrylǵan. Búkil respýblıkany kóterilis órti sharpydy. Bir anyǵy – fransýzdardyń shydamy shegine jetken. Bul sońǵy on jyldaǵy eń aýqymdy halyq narazylyǵy bolǵaly tur. Sheteldik basylymdardyń derekterine sensek, búgingi kúni 110 adam jaraqat alǵan. Onyń 20-y polısıa qyzmetkerleri. 260 adam temir torǵa qamalypty. Aqparatty jetkizýdi ózine mindet etken 12 jýrnalıs zardap shekken.
Al sherýdiń bolý sebebi halyq «sabyr túbi – sary altyn» deýden jalyqty. Osy ýaqytqa deıin kóp nársege kóz jumyp kelgen fransýzdar memlekettik saıasatqa túsinistikpen qaraýdan sharshady. Janarmaı baǵasynyń kóterilýi jyǵylǵanǵa judyryq boldy. Ashý men yzaǵa býlyqqan fransýzdar turǵyndarǵa qolaıly jaǵdaı jasamaıtyn memlekettik saıasatqa osylaısha narazylyq bildirdi.
