Almatyda turǵyndardy tegin tamaqtandyratyn «Ýaqyp» asqanasy ashyldy. Turmysy tómen turǵyndar úshin tamaqtaný orny aptanyń 5 kúninde jumys isteıdi. Ortalyq meshit qyzmetkerleriniń aıtýynsha, bul jerdiń jumysy jyl on eki aı toqtamaıdy.

Tegin asqanadan tústenýge kelgen jannyń biri –  Erǵalym Ádilhanuly. Kezinde jýrnalısıka mamandyǵyn bitirip, talaı baspasóz betine maqalam shyqqan deıdi. Alaıda, taǵdyr tálkegine túsken azamat ýaqytsha qıyn jaǵdaıda júrgenin aıtady. Qarashanyń qara sýyǵynda aqysyz tamaq taratatyn orynnyń ashylǵanyna qýanǵanyn jasyrmady.

«Adamdardyń jaǵdaılary ár túrli ǵoı. Basqa salǵan ómirdiń taýqymeti... Rahmetimdi aıtamyn endi, jaýraǵan kezde bir ystyq tamaq iship áldenip alǵan jaqsy ǵoı. Mundaıdy basqa salmasyn», – deıdi Erǵalym Ádilhanuly.

«Ýaqyp» asqanasyna tamaqtanýǵa kelgender arasynda balaly áıelder men múgedek jandar kóp. Bul orynnyń maqsaty da sol – jetim-jesir men jalǵyzbasty analarǵa, jaǵdaıy tómen otbasylarǵa sál de bolsa qoldaý kórsetý.

Munda kúnine 120 adamǵa deıin kelip, 3 mezgil tamaqtana alady. Tek aldymen Ortalyq meshittiń janyndaǵy «Ihlas» qaıyrymdylyq qaýymdastyǵynan arnaıy talon alý qajet.

«Jaqyn arada Almaty Ortalyq meshitiniń uıymdastyrýymen «Ýaqyp» asqanasyn ashýdy jón kórdik. Bir ǵana demeýshi kisi kelip, óziniń aty-jónin aıtýdy qup kórmedi. Aptanyń 5 kúninde 3 mezgil tegin tamaq taratylady. Talon qarnym ash, biraq ystyq tamaq ishýge múmkindigi joq kez kelgen jaǵdaıy tómen otbasyǵa beriledi», – dedi Almaty qalasy Ortalyq meshitiniń naıb ımamy Ermek Kókirekbaev.

Tegin tamaqtanatyn asqana Seıfýllın dańǵyly men Radıshev kóshesiniń qıylysynda ornalasqan. Bul jerge kúnine bir ret kelip aýqattanǵan adamnyń sol kúni qaıta kelip, tamaq jeýine shekteý joq. Tek qolynda arnaıy talony bolsa, jetkilikti.