«Zeket» qorynyń «El úlesi páterge» atty jobasy endi Almatydaǵy kómekke zárý otbasylarǵa járdem berýge daıyn. Buǵan deıin Qaraǵandy, Kókshetaý qalasynda óz jumysyn bastaǵan qaıyrymdylyq qory áleýmettik turmysy tómen jandarǵa jaǵdaı jasamaq. Qaıyrymdylyq jobadan qalaı kómek alýǵa bolady? Ony kimder úlestirip jatyr?  

Temirhanovtar otbasy Almatyǵa osydan 12 jyl buryn Shymkent qalasynan kóship kelgen. Sodan beri tar úıde tirshilik etip jatyr. Tipti, aıadaı bólmege syıyspaǵan soń tuńǵyshtaryn tanystarynyń úıine turǵyzýǵa májbúr bolǵan. Onyń ústine, búldirshinderdi mekteptegi synyptastary da kemsitetin kórinedi.

«Osy jerde rýhty bolǵym keledi», – deıdi Symbat Temirhanova.

«Men úlken úıim bolǵanyn qalaımyn. Synyptaǵy balalar meni mazaqtaıdy. «Sen kvartırada turasyń» deıdi. Men óz úıim bolǵanyn qalaımyn. Meni barlyǵy arasyna qospaıdy, synyptastarym kedeısiń dep kemsitedi», – deıdi kóz jasyna erik bergen jetkinshek Gúlnaz Seıfýllaeva.

Bul otbasy osyǵan deıin kómek surap talaı jerdiń tabaldyryǵyn tozdyrypty. Segiz balanyń tárbıesimen jumysqa shyǵa almaıtyn ana jubaıynyń jalaqysy tek páter jaldap turýǵa ǵana jetedi deıdi. Tipti, kóp balamen jalǵa úı tabýdyń ózi muń eken. Osydan bir apta buryn «El úlesi páterge» jobasyna baryp jaǵdaıyn túsindirip, ótinishin qaldyrǵan. 

«Qazaqstan Musylmandary dinı basqarmasyna, atalmysh zeket qoryna rahmet aıtqym keledi. Járdem surap barǵan edim. «Qolymyzdan kelgenshe kómektemesiz, qarasamyz» dedi. Mine, aıtýly kúni birden kelip otyr. Alǵysym sheksiz», – dep rızashylyǵyn bildirdi kópbalaly ana Gúljamal Seıfýllaeva.

2011 jyldan bastaý alǵan joba bıyl Almatyda iske asyrylýda. Osy ýaqytqa deıin elimizdiń basqa óńirlerinde kópshiliktiń kómegimen 5 otbasyna páter kiltin tabystasa, qalamyzda jyl basynan bastap 2 myń otbasyn qarjymen, azyq-túlik, kıimmen qamtamasyz etip úlgergen.

«Biz sondaı otbasylarǵa baryp, rasymen muqtaj ba, joq, tekserip alamyz. Keıin azyq- túlikteı, kıim keshekteı kómek kórsetemiz, qysta kómir jaǵatyn bolsa kómir, otynyn alyp beremiz. Úı kerek dese, úı de alyp beremiz. Úıi bitpeı jatsa, qurylys materıaldaryn jetkizip beremiz. Jer telimin de alyp beremiz. Jalpy, qandaı qaıyrymdylyqtyń túri bolatyn bolsa, sonyń barlyǵyn kórsetemiz», – dedi QMDB «Zeket» korporatıvtik qorynyń úılestirýshi bas mamany Nurken Dilmuhan.

Jobanyń basty maqsaty – muqtaj jandardy turǵyn úımen qamtamasyz etý. Qordyń qyzmeti ashyq, aıqyn jáne túsken qarajat boıynsha qaıyrymdylyq kórsetýshiniń suraýyna oraı kez kelgen ýaqytta járdem kórsetiledi.