Almatyda taǵy bir saıabaq aǵymdaǵy jóndeýden ótedi. Nátıjesinde, demalys ornynda balalarǵa jáne sportqa arnalǵan qos alań, ıtterdi qydyrtatyn bólek jer qarastyrylmaq. Jergilikti ákimdik saıabaqty jóndemes buryn halyqtyń talap-tilegin eskergen.

Almatyda HH ǵasyrdyń uly saıasatkeri Mahatma Gandı atyndaǵy saıabaq osydan 5 jyl buryn jóndeýden ótken. Halyqtyń súıikti demalys ornyn odan saıyn jaqsartý maqsatynda bıyl taǵy da qalypqa keltirý jumystary júrip jatyr. Aınalasy bir aıdyń ishinde munda 9 myńnan asa sharshy metr jol tegistelip, 8 myńǵa jýyq jerge gazon egiledi. Jasyl jelekti sýarý júıesi jańalanady.

Saıabaqqa jıi keletin turǵyndar da jóndeý jumystarynyń qolǵa alynyp jatqanyna razy. Mysaly, biz sózge tartqan turǵyn: «Bul jerde 21 jyldan beri turamyz. Saıabaq kúnnen kúnge jaqsaryp kele jatyr. Buryn bul jerde eshteńe bolmaǵan edi, birtindep jaqsara bastady. Bıyl tipti jaqsaryp keledi», dese, taǵy biri: «Bul jerde adam kóp keledi, sportpen aınalysatyndar da jeterlik. Demalyp kelýshiler de, balalaryn oınatý úshin keletinder de kóp. Bári qýanyp qalatyn boldy», – dep qýanyshty kóńil kúılerimen bólisti.

Saıabaqta túngi ýaqytta qydyrý barynsha qaýipsiz bolýy úshin qosymsha 180 jaryq shamy ornatylady. Balalar oınaıtyn alańqaı jáne jattyǵýǵa arnalǵan alań salynady. Sondaı-aq, arnaıy ıt qydyrtatyn 120 sharshy metrlik oryn da jasalady.

«Qazirgi tańda Mahatma Gandı atyndaǵy saıabaqta jóndeý jumystary júrip jatyr. Aýdan halqynyń suraýymen, ıtterdi qydyrtatyn oryn qarastyrdyq. Endi úı janýarlary arnaıy bólingen aýmaqta ǵana júredi. Ol jerde tıisti jaǵdaılar jasalady», – dedi Almaty qalasy Almaly aýdandyq kóriktendirý bóliminiń basshysy Ákimhan Tólegen.

Mamandar saıabaqty qaıta jóndeý kezinde 720 aǵashty sanıtarlyq qyrqýdan ótkizgen. Taǵy 20-dan astam qylqanjapyraqty tal egýdi josparlap otyr. Saıabaqty jóndeýge 50 shaqty jumysshy atsalysýda.

«Kishkentaı balalar oınaıtyn alańdardyń bárin bir jerge yńǵaıly etip toptastyryp jatyrmyz. Sport alańymyz bar. Sporttyq baǵdarlama boıynsha salynǵan eski alańdaǵy qurylǵylardyń bári óz ornynda tur. Tek synǵan, maıysqan tustaryn jóndep, qaıtadan ornyna qoıyp jatyrmyz. 4 oryndyqty sákiler qoıamyz. Olarǵa eki jaqtan otyrýǵa yńǵaıly bolady», – dedi merdiger mekemeniń dırektory Erkebulan Aıymbetov.

Únemdilik úshin mundaǵy eski bordúrler qoqysqa tastalmaıdy. Qaıta iske jaramdy bolǵandyqtan, dál osy saıabaqtaǵy joldarǵa tóselmek. Sondaı-aq, mundaǵy 60 shaqty otyrǵysh jańartylǵan soń, eskileri qajettilikke qaraı basqa jerlerge qoıylady. Al jóndeý jumystary qarasha aıynyń sońynda aıaqtalady.