«Qazbat» batalónynyń Iraktaǵy bitimgerlik mısıasyn aıaqtalǵanyna 10 jyl. Osyǵan baılanysty Almatyda «Iraktyń ortaq aspany astynda» atty fotokórme uıymdastyryldy. Jeltoqsanda elordada kópshilik nazaryna usynylyp, núktesi Polshanyń Gdansk qalasynda qoıylady.  

Kópshilik nazaryna usynylǵan 30 fotosýret sarbazdardyń estelikterine toly. 2003 jyly Saddam Hýseınniń bıligi joıylǵan soń, halyqaralyq uıymdar Iraktaǵy jaǵdaıdy turaqtandyryp álek. 4 qaýipsiz aımaq qurylyp, onyń ońtústik-ortalyq bóligindegi qaýipsizdikti «Ortalyq-Ońtústik» dıvızıasy óz moınyna alady. 23 memlekettiń áskerleri qatarynda qazaqstandyq sarbazdar da bar.

«Soǵystyń aty soǵys qoı. Biz qaqtyǵys bolyp jatqan jerlerdiń dál ortasynda boldyq. Tipti, oq astynda qalǵan kezderimiz boldy. Bir ret kúndiz, ekinshisinde túnde boldy», – dedi 28079 áskerı bólimshe komandıriniń orynbasary Asqar SMAǴULOV.

Bul fotosýretterden bir ǵumyrdy baıqaýǵa bolady. Iraktaǵy arnaıy mısıa qazaqstandyq sarbazdar úshin alǵashqy jáne umytylmas oqıǵa ekeni daýsyz. Olardyń aldynda turǵan mindet – jarylǵyshtardy zalalsyzdandyryp, qarý-jaraqtyń kózin joıý edi. Dál osy jerde, ókinishke qaraı, bir batyr erlikpen qaza tapqan eken.

2005 jyly 9 qańtarda bitimgerlik mısıasyn oryndaý barysynda kapıtan Qaırat Qudabaev kenetten qaza tabady. Ol óz denesimen jarylǵysh zatty jaýyp qalyp, qatarlastaryn ólimnen aman alyp qalǵan.

«Kapıtan Qudabaev Qaırat ekeýmiz bir topta bitimgershilik mısıasyn oryndadyq. Ol elde biz jarylmaı qalǵan jarylǵysh zattardy, mınalardy tazartyp, jergilikti halyqqa kómektestik», – dedi Qurlyq áskerleri áskerı ınstıtýtynyń aǵa oqytýshysy Erkebulan Embergenov.

Soǵys ult pen násilge qaramaıdy. Qazaqstandyq sarbazdardan bólek, munda ózge memleketterdiń de áskerleri bolǵan. Polshanyń bitimger-ardagerleri araǵa jyl salyp, qazaqstandyq qyzmettesterimen kezdesti. Saltanatty kezdesýde eki eldiń áskerı marshy oryndaldy.

«Qazaqstandyq áriptesterimen birge Irakta bolǵan bizdiń sarbazdarymyz álemge kómegin tıgizdi dep aıtar edim. Osy kórmeni ardagerlerimizge, batyrlarymyzǵa arnaı otyryp, «Qazbat» ardagerlerimen birge 15 jyldan keıingi kezdesýdi uıymdastyryp otyrmyz», – dedi Almaty qalasyndaǵy Polshanyń bas konsýly Radoslav Grýk.

Fotokórmeni astanalyqtar 25 jeltoqsanda tamashalaı alady. Odan keıin Polshanyń Gdansk qalasyndaǵy Ekinshi dúnıejúzilik soǵys mýzeıine jol tartady.