ALMATY ARENA men HALYK ARENA Ortalyq Azıa aýmaǵyndaǵy teńdessiz sport keshenderi sanalady. Tipten, ámbebaptyǵy jaǵynan álemde úzdik otyzdyqqa kiredi. Sarapshylardyń pikirinshe, qystyq jáne jazdyq sport túrlerimen aınalysýǵa múmkindik beretin zamanaýı keshen kásibı ǵana emes, áýesqoı sportshylardyń kóbeıýine de múmkindik beredi.
Búginde atalǵan keshenderde kónkımen jappaı syrǵanaý maýsymy ashyldy. Al qala ákimdigi bul jerler azdyq etpes úshin qalanyń ár aýdanynan tegin kónkı tebetin muz aıdyndaryn taǵy da ashpaq.
Aýmaǵy 1800 sharshy metrdi quraıtyn ALMATY ARENA aıdynda jappaı syrǵanaý tek senbi jáne jeksenbi kúnderi ǵana ótedi. Saǵat 11-den túngi 23-ke deıin bes aýysymmen jumys isteıtin aıdynda kúnine 1250 adam erkin demalýǵa múmkindik bar.
Osymen úshinshi jyl jappaı syrǵanaý maýsymyn uıymdastyrýǵa daıyndalǵan arenanyń ákimshiligi áýesqoı kónkıshilerdiń sany artyp keledi deıdi. Ótken maýsymda munda 500 myńnan asa adam aıaǵyna kónkı kıipti. Kópke qajetti kónkıdiń barlyq ólshemin jańalaǵan arenanyń adamdary sapaly qyzmet kórsetýge saımyz deıdi.
Bes aýysymmen jumys isteıtin aıdynnyń baǵasy bes túrli. Tańǵy kesteniń quny 300 teńgeden bastalsa, keshke qydyrý eresekter úshin 1 500 teńge. Árbir eki saǵat saıyn arnaıy mashına muzǵa ystyq sý shashyp, krıstaldy qabatyn jańalap turady.
«Adamdar bıyl kóp keledi dep oılaımyz. Úsh jyldan beri jumys istep kelemiz, halyq úırene bastady. Qaýipsizdik úshin 14 jasqa deıingi balalardyń basyn, shyntaǵyn jáne tizesin qorǵaıtyn arnaıy kıimder kıgizip qana muzǵa jiberemiz», – deıdi ALMATY ARENA muz aıdynynyń ákimshisi Darhan Eginbaev.
Al, qalanyń shyǵysyndaǵy HALYK ARENA kesheninde bir mezette eki syrǵanaq aıdyny qatar jumys isteıdi. Jalpyhalyqtyq jappaı syrǵanaý tek senbi-jeksenbi kúnderi bolsa, basqa kúnderi shaıbaly hokeı, mánerlep syrǵanaý, kerlıng syndy qysqy oıyn túrlerinen komandalar jattyǵady.
«Mundaı muz aıdyndar álemniń barlyq elinde bar dep aıta almaımyz. Ortalyq Azıa boıynsha teńdesi joq. Al, álem boıynsha alatyn bolsaq, ekeýi de úzdik otyzdyqqa kiredi. Buryndary shetelge aqshamyzdy kóp shashatynbyz. Búkil sportshylarymy shetelge baryp jattyǵatyn. Qyp-qyzyl shyǵyn. Al endi barlyǵy ózimizde daıyndalady», – deıdi sport sholýshysy Raýan Oqas.
Qala ákimdigi tórt iri muz aıdynymen ǵana shektelmeı (ALMATY ARENA, HALYK ARENA, «Medeý» Balýan Sholaq atyndaǵy sport saraıy), ashyq aspan astynda taǵy bes jerden áýesqoılarǵa arnalǵan syrǵanaý alańdaryn ashpaq. Jeltoqsan aıynyń birinen bastap buqaraǵa beriletin oryndardy daıyndaý jumystary qazir júrip jatyr. Keń kósilip syrǵanaý úshin bıyl ashylatyn oryndardyń árqaısysy 900 sharshy metrden kem bolmaıdy.
«Muz aıdynynda syrǵanaý 100% tegin bolady. Óziniń kónkıimen kelgen adam kez kelgen ýaqytta aqysyz syrǵanaı alady. Bıyl syrǵanaý ýaqyty túngi saǵat 11-12-ge deıin uzardy. Byltyr kónkıdi jalǵa alý 600 teńge bolsa, bıyl ol júz teńgege qymbattap, esesine eki saǵat syrǵanaýǵa múmkindik berdik», – deıdi joba jetekshisi Muhamedjan Óser.
Sonymen, aldaǵy aıda ashylatyn aıdyndar:
• Ortalyq mádenı jáne demalys saıabaǵy;
• «Atakent» kórmesiniń aldy;
• Tuńǵysh Prezıdent saıabaǵy;
• Baıseıitova men Qurmanǵazy kósheleriniń qıylysy;
• «Mart» saýda oıyn ortalyǵynyń jany.
Bıylǵy qystyń uzaq bolatynyn eskergen uıymdastyrýshylar kem degende jarty mıllıon jan syrǵanaý kıimderin jalǵa alady dep, tórt jarym myń jańa kónkı qosypty.
