Almaty qalasynyń transporttyq reformasy Orta Azıa elderine úlgi bolýda. Bishkek, Tashkent qalalary «júrginshilerge arnalǵan qala» konsepsıasyna bet bursa, elorda Almatydaǵy elektrondy tólem júıesi negizinde eleýli jumys atqaryp jatyr. Qoǵamdyq kóliktegi basqarý sapasy men qyzmet kórsetý mádenıeti konferensıasynda sarapshylar osyndaı pikirge toqtaldy.

«Qalalardy salystyrýǵa bolmaıdy. Óıtkeni, ár óńirdiń qarjylyq jaǵdaıy men klımattyq erekshelikterine baılanysty júrgizip jatqan transporttyq reformasy ártúrli. Árıne, úlgi retinde qaraýǵa negiz bar. Almaty qalasynyń tájirıbesine keletin bolsaq, ınvestısıa tartylǵanyn, parkterdiń jańarǵanyn kórip otyrmyz. Qazir júrgizýshilerdiń kásibı deńgeıin kóterý úshin eleýli jumystar atqarylyp jatyr eken. 6-7 jyl burynǵy jaǵdaımen salystyrǵanda áldeqaıda jaqsy der edim», – deıdi Halyqaralyq qoǵamdyq kólikter keńesiniń Máskeý, Astana qalalaryndaǵy keńsesiniń jetekshisi (Máskeý) Iýsýp Hasıev.

Degenmen, júrgizýshilerdiń kásibı jaramdylyǵy men olardyń qyzmet kórsetý mádenıeti áli de bolsa aqsap tur. Transport mamandarynyń biliktilik ortalyǵy uıymdastyrǵan qazan aıyndaǵy attestasıalaýdan 2 myńnan asa kólik tizgindeýshiniń jartysyna jýyǵy súrinipti. Biraq olar jumystan birden qýylmaıdy. Almaty ákimdigi olardy qaıta oqytý úshin arnaıy baǵdarlama oılastyrǵan. Testileýden keıin 600 qoǵamdyq kólik júrgizýshisin oqytý úshin jergilikti búdjetten qarajat bólipti.