Almatyda ornalasqan LA-155/18 túzetý mekemesiniń kútý zaly «Open space» formaty, ıaǵnı qabyrǵasy joq, ashyq alań etip qaıta salynady. Bastalǵan jóndeý jumystary Táýelsizdik kúni qarsańynda aıaqtalmaq. Al qaladaǵy aýdandyq İshki ister basqarmalarynda 12 front ofıs pen 3 tekserý pýnkti boı kóteredi. Alyp shaharǵa jumys barysymen kelgen Memlekettik qyzmet isteri jáne sybaılas jemqorlyqqa qarsy is-qımyl agenttigi janynan qurylǵan Qoǵamdyq keńes birneshe nysanǵa bas suqty.

Almatynyń damý qarqyny men atqarylyp jatqan qyrýar tirlikti kórýge Astanadan  Qoǵamdyq keńes músheleri keldi. Memlekettik qyzmet isteri jáne sybaılas jemqorlyq qarsy agenttik janynan quralǵan uıym aldymen Quqyq qorǵaý qyzmetteri ortalyǵymen tanysty. Almatyda kelesi jyldan bastap qylmystyq ister tek elektrondy túrde júrgizilmek. Bul birinshiden, ýaqyt únemdeıdi, odan soń tom-tom isterdiń joǵalyp ketpeýine septesedi.

«Planshetter satyp alyp jatyrmyz. Bári avtomatty túrde bolady. Olardy İİD-ne, prokýratýraǵa qoıamyz. Kelesi jyldyń 1 qańtaryna deıin júz paıyz elektrondy formatta bolýy kerek. Bul bir de bir qujat joǵalyp ketpeýi úshin jasalyp jatqan qadamdar», – dedi Almaty qalasy ákiminiń orynbasary Erlan Áýkenov.

Almatyda 2018-2021 jyldar aralyǵynda qoǵamdyq oryndarda 1 myńdaı beınebaqylaý kamerasy ornatylmaq. Bul úshin búdjetten 8 mıllıardan astam qarjy bólindi. Bul qylmys sanyn azaıtady dep sendirdi qala ákiminiń orynbasary Erlan Áýkenov. Sondaı-aq, osy aralyqta jol qozǵalysyn baqylaıtyn avtomattandyrylǵan 140-tan astam post ornatylady.

«Bizde 156 kamera bolǵan. Olar 2000-shy jyldary ornatylǵan. Endi olardyń bári eskirdi. Sapalary da tómen. Qazir qolǵa alǵan jobamyzdy aıaqtap qaldyq. Jeltoqsan aıynda jobalyq-smetalyq qujattamasy daıyn boladyy. Qańtar aıynda konkýrs jarıalap, aqpanda qurylys jumystaryn bastaımyz», – dep atap ótti Erlan Áýkenov.

Odan keıin Memlekettik qyzmet isteri jáne sybaılas jemqorlyqtyń aldyn alý suraqtary boıynsha Qoǵamdyq keńes músheleri Jetisý aýdandyq salyq basqarmasyna bardy. Jańartylǵan memlekettik mekeme bir tereze qaǵıdasy boıynsha jumys isteıdi. Sonymen qatar, munda elektrondy kezek, ekinshi deńgeıli bankter men «Qazposhta» kasalary bar.

«Ótken jyldan beri tolyqtaı kedirgisiz jumys isteý prınsıpine kóshtik. Jańartylǵan formatqa Almatydaǵy Jetisý, Medeý, Alataý jáne Naýryzbaı aýdandaryn aýystyrdyq. Aldaǵy jyly qalǵan 4 aýdandy kóshirip, jumystardy aıaqtaımyz. Oǵan qosa, Grýzıanyń tájirıbesin alyp, dóńgelektegi mobıldi ofıs jobasyn qolǵa alýdy josparlap otyrmyz», – Almaty qalasy Memlekettik kirister departamenti basshysynyń orynbasary Qanat Baltabekov.

Astanalyq qonaqtar keıin Almatyda jańadan ashylǵan Birikken Ulttar Uıymynyń úıine arnaıy bardy. İzin ala Open Almaty qoǵamdyq qabyldaý jáne Smart point kovorkıng-ortalyqtarynyń jumysynan habardar boldy. Al İT-mamandary «Smat-sıtı» jobalarymen tanystyrdy. Keıin memlekettik qyzmettiń sapasy men sandyq júıege ótý jaıynda qalalyq máslıhat depýtattary men Qoǵamdyq keńes múshelerimen kezdesip, talqylasty.

Aıta keteıik, Qoǵamdyq keńes músheleri jumys sapary barysynda jumyspen qamtý ortalyǵyna jáne Almatynyń kólik holdıńine de bas suqty. Almatydaǵy birneshe memlekettik mekemeniń jumysymen tanysqan delegasıa tájirıbeni elimizdiń ózge óńirlerine engizý máselesin kótermek.

«Almatydaǵy jumys sapary barysynda Qoǵamdyq keńestiń músheleri biraz memlekettik mekemege bardyq. Qalada kóptegen máseleniń oń sheshimin tapqanyn kóz kórdi. Tipti aldaǵy ýaqytqa josparlary da bar eken. Osy maqsattar oryndalsa, onda tashama. Quqyq qorǵaý qyzmetteri ortalyǵy, salyq basqarmalary halyqqa yńǵaıly etip jasalǵan. Beınebaqylaý kameralaryn ornatý da oń bastama», – dedi Memlekettik qyzmet isteri jáne sybaılas jemqorlyqqa qarsy is-qımyl organdarynyń qyzmeti máseleleri boıynsha qoǵamdyq keńesiniń tóraǵasy Serikjan Qanaev.

«Maqsat – Almatynyń sıfrlandyrý tájirıbesin, mekemeler qyzmetterin azamattarǵa, turǵyndarǵa qoljetimdi jasaý ǵoı. Osy tájirbıeni basqa da qalalarda, basqa oblystarda da jarıalap, tanystyryp, úıretip, osynda kórip ketýge bolady. Áli alda isteıtin josparlary bar eken. Biz shetelderge shyǵyp júrgende osyndaı júıelerdi zerttep, qarap júrmiz. Onyń kóbi osynda engizilip jatyr», – dedi Memlekettik qyzmet isteri jáne sybaılas jemqorlyqqa qarsy is-qımyl organdarynyń qyzmeti máseleleri boıynsha qoǵamdyq keńesiniń múshesi Mırbolat Jaqypov.