Úkimettik emes uıymdardy qoldaýǵa beriletin granttar jańa ereje boıynsha beriledi.

Buǵan deıin áleýmettik jobalardy qarjylandyrýǵa qarajatty tek Qoǵamdyq damý mınıstrligi ǵana beretin. Endi ony jergilikti atqarýshy organ da berýge quqyly bolmaq. Bul týraly Almatyda ótken Hİ Azamattyq forýmda «Azamattyq bastamalardy qoldaý ortalyǵy» komersıalyq emes aksıonerlik qoǵamynyń tóraǵasy Nurlan Óteshov aıtty.

Forým barysynda Astanada Elbasynyń qatysýymen bolatyn VIII respýblıkalyq azamattyq forýmǵa qala atynan qatysatyn 30 delegat irikteldi.

«Kelesi jyldan bastap tek respýblıkalyq deńgeıde ǵana emes, sonymen qatar, qalalyq bolsyn, aýdandyq bolsyn, aımaqtyq deńgeıde de memlekettik granttardy iske asyrýdy qolǵa almaqpyz. Ony biz zańnama túrinde daıyndyqty ótkizgen bolatynbyz. Endi jumysty ary qaraı atqarý úshin úkimettik emes uıymdardyń belsendilerine jyldyń aıaǵyna deıin josparǵa mán berýi kerek ekenin aıtpaqpyz», – dedi «Azamattyq bastamalardy qoldaý ortalyǵy» komersıalyq emes aksıonerlik qoǵamy tóraǵasy Nurlan Óteshov.  

«Shyndyǵyn aıtqanda, kóptegen uıymdardyń aty bar da, zaty joq. Kóptegen uıymdar naqty bir jobalarǵa qatysty tirkeledi. Qarajaty bolsa jumys isteıdi, qalǵan ýaqytta jumys istemeıdi degendeı. Sol uıymdardyń máselesin retteý kerek. Shyn máninde, 20-30 jyl boıy turaqty jumys istep, jyldan-jylǵa jumysyn údetip jatqan uıymdar da joq emes. Qalǵany da sondaı deńgeıge jetýi tıis. Bul tek búdjettiń máselesine tirelmeýi kerek. Múddeniń máselesi bolýy kerek», – deıdi saıasattanýshy Aıdos Sarym.

Búgingi tańda elimizde 20 myńǵa jýyq úkimettik emes uıym bolsa, onyń 20 paıyzy Almatyda ornalasqan. Azamattyq forýmda Qoǵamdyq keńestiń mártebesin kóterý jaıy sóz boldy.  

«Bul alǵashqy Qoǵamdyq keńes. Ol ary qaraı onyń jumysy qandaı bolady, olar qalaı irikteledi, qalaı tańdalyp alynady, olardyń kólemi, adam sany qansha bolady degen sıaqty máselelerdiń barlyǵy ózekti bolyp otyr. Sondyqtan osy máseleler de talqylandy», – dedi Almaty qalasy Qoǵamdyq keńesiniń múshesi Dáýren Babamuratov.