Almatyda bılik basyndaǵylar men kásipkerler qaladaǵy kóshelerdi modernızasıalaýdyń shaǵyn jáne orta bızneske tıgizgen áserin talqyǵa saldy.

Qazirgi tańda «Júrginshilerge arnalǵan qala» jobasy aıasynda 500 kóshe jáne 1400-ge jýyq eski aýla jóndeýden ótken. Jańartylǵan qala kóshelerindegi kásipkerlik belsendiligi men taýar aınalymy 15-ten 40 paıyzǵa deıin artqanyn júrgizilgen zertteý dáleldep otyr. Jyl basynan beri bıznestiń 50-den astam jańa nysany ashylǵan. Qala ákiminiń orynbasary Almas Mádıevtiń sózinshe, kásipkerler tarapynan aıtylatyn pikirler eskerýsiz qalmaıdy.  

«Biz bir orynda qalyp, qalany jańartýdan bas tarta almaımyz. Eger kimde-kim tıisti kelýshilerden aıyrylyp, satý deńgeıi tómendese, qala tarapynan kómektesýge, naryqta damýǵa, nesıe rásimdeýge qashanda daıynbyz. Reformalar qalada jaıly jaǵdaı jasap, turǵyndardyń ómir súrý sapasyn arttyrýǵa baǵyttalǵan. Sondaı-aq, shaǵyn jáne orta bıznesti, ekonomıkany turaqty damytýdy da qatar alyp júremiz. Qazirgi tańda ekonomıkadaǵy saýda kólemi 33 paıyzdy quraıdy. Taýar aınalym kórsetkishin azaıtpaý kerek. Jańartylǵan kóshelerde halyqqa da, velosıped mingenderge de jaǵdaı jasalǵan», – dedi Almaty qalasy ákiminiń orynbasary Almas Mádıev.

Óz kezeginde, shaǵyn jáne orta kásipkerlik odaǵynyń basshysy Tımýr Járkenov qala saıasatynyń qoǵamdyq keńistikti ózgertýge degen nıetine qoldaý bildirdi. Tek jergilikti bılikten keıbir naqty máselelere jekeleı nazar aýdarýyn surady.

«Taǵy da qaıtalaımyn, tamasha jumys atqarylyp jatyr. Degenmen, kishigirim máseleler bar. Keı tusta kásipkerlerdiń de pikiri eskerilse eken. Aıtqandarymyz tájirıbede iske assa deımiz. Biz velojolaqqa, júrginshiler jolyna zıan keltirmesten, keıbir máselelerdi retteýge usynys jasaýǵa múmkindik alsaq eken», – dedi Shaǵyn jáne orta kásipkerlik odaǵynyń basshysy Tımýr Járkenov.