Almatyda aýqattylarǵa arnalǵan qara qyzanaq ósirildi. Indýstrıaldy aımaqtaǵy jylyjaıda shyqqan qyzanaqtyń ózindik quny qymbat bolǵandyqtan, ázirge tek tapsyrys berýshilerge ǵana jiberilip jatyr. Sondyqtan qara qyzanaq ázirge naryqqa shyǵarylmaıdy. Jylyjaı basshylary esesine, halyqty qysta ózge kókenistiń túrlerinen qysylmaıtyndaı qamtamasyz etemiz deıdi. 

Bes gektar jerde qıardyń 147 myń túbi bar. Úsh aı saıyn aýystyrylatyn árbir túpte kemi 20 keli qıar jınalady. Bıylǵy qystyń alǵashqy ónimin jınap jatqan agronomdar kúnine 17-18 tonna qıardy naryqqa jiberedi.

Jylyjaıdan alynǵan ónimder qyspen birge qymbattaǵan kókónis baǵasynyń asa sharyqtap ketpeýine sebepker bolmaq. Topyraqsyz, tek sý arqyly mıneraldy qorekpen ósetin qıarǵa golandıalyq ádis qoldanylady. Ylǵaldy jerde erekshe kútimmen shyqqan ónimderdiń 60 paıyzdan astamy Almaty tutynýshylaryna, qalǵany ózge óńirler men Reseıge eksporttalady.  

«Kókónisterdi gıdroponıka ádisimen ósiremiz. Arnaıy mıneraldy tyńaıtqyshtardy ósimdikke berý arqyly ósimdik qajetti mıneraldardy topyraqsyz-aq ózine ala alady. Jazda ónim kóp bolady. Óıtkeni, kún molynan túsedi», – deıdi agronom Nursultan Ashyqbaev.  

Al tomat ósiretin bes gektar jerde qyzanaqtyń 8 túrinen ónim jınalyp jatyr. Onyń ishinde «qara qyzanaq» atalyp ketken «Hýanıta» sorty golandıalyq ádispen alǵash ret ósirilip, tek tapsyrys bergen meıramhana men baı-baǵlandar ǵana baratyn dúkenderge jiberilip jatyr. Basshylardyń aıtýynsha, bul sorttan kúnine 300 kelige deıin ónim jınalǵanymen, onyń ózi tapsyrys berýshilerden artylmaıdy.

«Qara tústi qyzanaqtyń aty «Hýanıta». Onyń eki túri bar. Kýmato degen úlken túri jáne kishkenesi bar. Olardyń bárin premıýmdy sektorǵa jibersek dep otyrmyz. Dámi óte erekshe. Kórdińizder. Lımonchelo degen sortymyz bar. Olardyń barlyǵy joǵary sanatty alýshylarǵa arnalǵan», – dedi jylyjaı dırektory Nurlan Ádilhan.  

Qazir Almatyda memlekettiń qoldaýymen organıkalyq tabıǵı taza ónim ósirýmen aınalysatyn osy bir ǵana iri jylyjaı bar. 12 gektar jerde ósetin ónim Almatydaǵy naryqtyń tek 30 paıyzyn ǵana qamtıdy. Jyl kóleminde 4 myń tonna qıar, 3500 tonna tomat ónimderinen basqa, baklajan men burysh ta ósirilip jatyr. Biraq bunyń bári joǵary suranysty qamtı almaǵandyqtan, jylyjaıdyń aýmaǵyn taǵy 10 gektarǵa ulǵaıtý jobasy tur.