«Saıaly-1» jáne «Saıaly-2» yqshamaýdandarynda 29 úıdiń qurylysy aıaqtalýǵa jaqyn. Almatynyń Alataý aýdanynda «Nurly jer» jáne «Nurly jol» baǵdarlamasy aıasynda turǵyn úı qurylysy qarqyndy júrip jatyr. Ol baspanalar qashan paıdalanýǵa beriledi?

«Saıaly-1» shaǵynaýdanynyń ózinde bıyl 98 kópqabatty turǵyn úı salynyp bitse, onyń 83-i paıdalanýǵa berilgen. Qazirgi kúni taǵy 15 úıdiń qurylysy bitken. Al «Saıaly-2» yqshamaýdanynda 14 úıdiń qurylys jumystary aıaqtalýǵa jaqyn. Qos shaǵynaýdandaǵy 29 kópqabatty úı jeltoqsan aıynda paıdalanýǵa berilmek. Iaǵnı, jyl sońyna qaraı myńǵa jýyq otbasy qonys toıyn toılamaq.

«Qazirgi tańda Alataý aýdanynda 372 úı salynyp bitti. Onyń kólemi 2 mln 300 sharshy metrdi quraıdy. Qazirgi tańda kópqabatty úıler salynyp jatyr. Mektep, balabaqshalar, jańa alańdar da salynýda. Osy jyly biz qala ákiminiń tapsyrmasymen Alataý aýdanynda 20 alań saldyq», – dedi Almaty qalasy Alataý aýdany ákimi apparatynyń komýnaldyq-sharýashylyq bóliminiń basshysy Ádilet Toqtasynov.

Almatyda bıyl 9 aıynda 1,5 mıllıondaı sharshy metr turǵyn úı salyndy. Oǵan 11 myń 200 otbasy jańa páterlerge qonystanǵan.  

«Bıyl Almaty qalasy boıynsha 1 mln 300 myń sharshy metr úı paıdalanýǵa berildi. Sonyń ishinde, «Nurly jer» memlekettik baǵdarlama boıynsha 121 úı salynyp jatyr. Ol degenimiz, 3600 páter», – dedi Almaty qalasy Qurylys basqarmasy basshysynyń orynbasary Qýandyq Aıtmaǵambetov.

Bıyl megapolıste «Nurly jer» baǵdarlamasy aıasynda 63 turǵyn úı paıdalanýǵa berilip, 3 myńnan asa otbasyǵa páter kilti tabystalǵan. Qazirgi tańda jalpy aýmaǵy 257 myń sharty metrdi quraıtyn taǵy 74 úıdiń qurylysy qarqyndy júrip jatyr.