Aqtóbe oblysynda Táýelsizdik kúnine oraı 32 áleýmettik nysan ashylady.
Aqtóbe oblysynyń ákimi Berdibek Saparbaev jeltoqsan aıynda ótetin aldaǵy merekelerge daıyndyq máselesi boıynsha jıyn ótkizdi. İshki saıasat basqarmasynyń basshysy Bulbul Eleýsinova málimdegendeı, 20 qarashada bastalǵan Táýelsizdik kúnine arnalǵan merekelik sharalar 17 jeltoqsanda aıaqtalady. Bul kúnderi oblysta 250 myńǵa jýyq adamdy qamtyǵan 400-den asa aýqymdy mádenı-kópshilik, áleýmettik mańyzy bar sharalar ótedi. Eldiń basty merekesi qarsańynda 32 jańa óndiristik jáne áleýmettik nysandardy ashý josparlanyp otyr. Atap aıtqanda, eki mektep, bes balabaqsha, bes kópqabatty turǵyn úı, aýyldarda tórt gazben jáne sýmen jabdyqtaý nysandary, ońaltý ortalyǵy, eki sporttyq nysan men t.b. paıdalanýǵa berilmek. Oblys ákimi Berdibek Saparbaev az qamtylǵan jáne kóp balaly otbasylardy, múgedekter men áleýmettik jaǵynan aljýaz toptarǵa jatatyn basqa da azamattardy qoldap, materıaldyq kómek kórsetýge basa nazar aýdarýdy tapsyrdy.
"Memlekettiń qamqorlyǵy men merekelik kóńil-kúıdi árbir otbasy, árbir aqtóbelik sezinýi kerek", - dedi óńir basshysy.
Jıyn kezinde sondaı-aq, Jańa jylǵa daıyndyq jáne ony ótkizý sharalarynyń jospary da qaraldy. Aqtóbe qalasy ákminiń orynbasary Kúlparshyn Aıdarhanovanyń sózinshe, oblys ortalyǵynyń kóshelerinde 17 jeltoqsannan bastap elýden asa jańa jyl shyrshalary ornatylyp, merekelik jaryqtandyrýlar uıymdastyrylady. Abaı dańǵylyn bezendiretin bas shyrshanyń bıiktigi otyz metr. Ony 18 jeltoqsanda saltanatty túrde jaǵady dep josparlanyp otyr. Jańajyldyq shyrshalar sondaı-aq, QR Tuńǵysh Prezıdenti atyndaǵy saıabaqta, Arbatta, «Batys-2» (Muz saraıy janyndaǵy) jáne «Nur Aqtóbe» turǵyn úı alaptarynda ornatylady. Ortalyq stadıon aýdanynda qala turǵyndary men qonaqtary úshin muz qalashyǵy ashyldy. 14 jeltoqsannan bastap qala boıynsha barlyǵy 48 muz aıdyny jumys jasaı bastaıdy. 80 myńnan astam balaǵa myńnan asa jańa jyldyq erteńgilikter ótedi. 31 jeltoqsan kúni turǵyndarǵa yńǵaıly bolý úshin Aqtóbedegi QR Tuńǵysh Prezıdenti atyndaǵy saıabaqta, «Batys-2» jáne «Nur Aqtóbe» turǵyn úı alaptarynda alǵash ret basty mádenı-kópshilik jańajyldyq sharalar men merekelik ot shashýlar uıymdastyrylady. Budan basqa, meıramdar aldynda qalanyń túrli núktelerinde azyq-túlik ónimderiniń keń tańdaýy arzan baǵamen satylatyn aýyl sharýashylyǵy jármeńkeleri turaqty túrde ótkiziledi. Óńir basshysy merekelik sharalardy joǵary deńgeıde ótkizý úshin barlyq sharalardy qabyldaýdy tapsyrdy.
