Qazaqstan Respýblıkasynyń Táýelsizdigi qarsańynda Aqtóbe oblysynyń Baıǵanın aýdanyndaǵy «Qojasaı» ken ornynda zamanaýı gaz óńdeý kesheni paıdalanýǵa berildi. Indýstrıalandyrý kúnine arnalǵan dástúrli telekópir kezinde memleket basshysy tikeleı efır arqyly iri zaýyttyń jumysyn bastaýyna ruqsat berdi.
* Bul óńir turǵyndary úshin óte qýanyshty jańalyq. Qazaqstan munaı men gaz óndiretin elderdiń biri bolyp tabylady, sondyqtan turǵyndardy gazben qamtamasyz etý – bizder úshin mańyzdy mindet. Qazir biz «Saryarqa» gaz qubyryn salaıyn dep jatyrmyz jáne osynyń bári halyqtyń ál-aýqatyn kóterý úshin jasalýda. Men sizderdi qýanyshty jańalyqpen, óndiristiń iske qosylýymen quttyqtaımyn. Sát sapar! – dedi Nursultan Nazarbaev.
«Gas Processing Company» JSHS kásiporny salǵan ilespe munaı gazyn kádege jaratatyn zamanaýı zaýyttyń jańa qondyrǵysy jylyna 226 tekshe metr taýarly gaz, 37 tonna propan-býtan qospasyn, 5,4 myń tonna gaz kondensatyn, 10,5 myń tonna túıirshiktelgen kúkirt shyǵarýǵa múmkindik beredi.
* Búgin eldegi gaz salasynyń iri ındýstrıaldy jobalarynyń biri paıdalanýǵa berildi. Zaýyt zamanaýı talaptarǵa saı eń jańa tehnologıalarmen jabdyqtalǵan. Onyń eldegi resýrstyq bazany toltyrýdaǵy mańyzy zor. «QazTransGaz» AQ ulttyq operatory gazdy ishki jáne syrtqy naryqqa tasymaldaý úshin barlyq qajetti ınfraqurylymdy salǵan,-dedi «Gas Processing Company» JSHS jobasynyń basshysy Bolat Saqtaǵanov jýrnalıserge.
Gazdy keshendi daıyndaý qondyrǵysy shıkizat bazasyn utymdy paıdalanýǵa, ilespe munaı gazyn qaıta óńdeýdi arttyrýǵa jáne zıandy zattardyń atmosferaǵa shyǵýyn edáýir azaıtýǵa múmkindik beredi.
* Jańa kásiporynnyń óńir ekonomıkasyn jaqsartýda máni zor. Bul Qazaqstanda jeke ınvestısıa esebine salynǵan jalǵyz gaz óńdeý zaýyty. Onyń qurylysy kezinde 1500 jumys orny quryldy, sonyń 250-den astamy - turaqty. Aıta ketý kerek, bul eksportqa baǵdarlanǵan kásiporyn – ónimniń 70 paıyzy syrtqy naryqqa jetkiziletin bolady,- dep atap ótti Berdibek Saparbaev.
Jańa kásiporyn jeti jyldyń ishinde óńirlik jáne respýblıkalyq búdjetti 10 mlrd teńgeden astam salyq túsimderimen toltyrady dep josparlanyp otyr.
