Almatyda «Nur Otan» partıasy fraksıasynyń otyrysynda memlekettik baǵdarlamalardyń oryndalý barysy qaraldy jáne 2019 jylǵy qala búdjetine birqatar usynystar engizildi.

Depýtattarmen kezdesý kezinde Almaty ákimi Baýyrjan Baıbek megapolıs búdjetiniń áleýmettik sıpatty saqtap qalatynyn jáne Memleket basshysynyń Joldaýy men «Nur Otan» partıasynyń Doktrınasyna tolyq saı keletin ár adamǵa qamqorlyq qaǵıdasyna negizdelgen «Almaty-2020» qalalyq baǵdarlamasyn júzege asyrýǵa baǵyttalatynyn atap ótti.

«Halyqqa qoldaý kórsetýdiń naqtyly mindetteri aıqyndalǵan Memleket basshysynyń Joldaýyn júzege asyrý úshin 106 sharadan turatyn jalpyqalalyq baǵdarlama qabyldandy jáne qajetti resýrstar bólindi. Bizdiń basty mindetimiz - Almatyny jaıly, qaýipsiz jáne órkendegen qalaǵa aınaldyrý. Aıta keterligi, qalada mańyzdy sheshimderdiń barlyǵy «Nur Otan» partıasynyń jáne máslıhattaǵy depýttar fraksıasynyń qatysýymen ǵana qabyldanady. Mysaly, depýtattar búdjettik qarjylandyrý kólemin ulǵaıtýdy, jergilikti máni bar joldardy ortasha jóndeýden ótkizýge monıtorıń júrgizýdi, sonymen qatar sırek kezdesetin ári orfandy syrqattarǵa ushyraǵandarǵa dári bólý úshin monıtorıń pen aýdıt júrgizýge qatysty komısıa qurýdy usyndy», - dedi Baýyrjan Baıbek.

Jıyn barysynda jetekshi partıa fraksıasynyń depýtattary qalaǵa qosylǵan aýdandardy sýmen qamtamasyz etýge, jol salý men olardy jóndeý jumystaryna aıryqsha nazar aýdarý qajettigin atap ótti.

«Qalaǵa qosylǵan aýdandardan shaǵym kóp túsedi, óıtkeni, mundaǵy ınfraqurylym qalanyń ortalyǵymen birdeı damýdy qajet etedi. Sýmen qamtamasyz etý jáne kárizdi jóndeý jumystary aıaqtalǵan soń bulardaǵy keıbir joldar jaramsyz bolyp qalǵan. Mundaǵy turǵyndardyń kóptegen ótinishterin eskere kelip, 1,8 mıllıard kóleminde búdjettik qarjy bólýdi suraımyz», - dedi máslıhat depýtaty Rahman Alshanov.

Óz kezeginde fraksıa múshesi Sergeı Kozlov eldi mekender turǵyndarynan kóshe jaryǵyn júrgizdi talap etetin shaǵymdar túsetinin de aıtty.

«Ekonomıka jáne búdjet jónindegi komısıa tóraǵasy retinde Ekonomıka basqarmasymen birge aldyn-ala esepteýler júrgizdim, nátıjesinde birqatar aýdandardyń, sonyń ishinde Alataý jáne Naýryzbaı aýdandarynyń kóshelerin jaryqtandyrý úshin 808,3 mln. teńge qajet», - dedi ol.

Bulardan ózge, depýtattyq fraksıa músheleri qart adamdarǵa qoldaý kórsetý, olarǵa durys demalys uıymdastyrý, «Darhan», «Zará Vostoka», «Rahat-Madenıet», «Trýdovık» yqsham aýdandarynda mektepter salý sıaqty mańyzdy máselelerdi kóterdi. «Nur Otan» partıasynyń músheleri aýtızm, balalardyń serebraldy sal aýrýyna, Daýn sındormyna shaldyqqandarǵa, psıhıkalyq jaǵynan jetilýi jáne tiliniń shyǵýy qıyn balalarǵa erekshe qamqorlyq kórsetý úshin qarjy bólýdi surady.