Eki aı buryn Nú-Iork qalasynda "Bolashaq" baǵdarlamasymen oqyp jatqan Bekbolat (esimi ózgertildi) informburo.kz redaksıasyna habarlasyp, bir alaıaq otandasymyz týraly aıtyp berdi. Sol kúnnen bastap redaksıa tilshisi Arman Belasarov degen Qazaqstan azamatynan jábir kórgender jaıly málimet jınaýǵa kiristi.

– Alaıaq áli de bostandyqta júr. Ony jazaǵa tartarlyqtaı faktiler jetkilikti. Biraq quqyq qorǵaý organdarynyń jumysy ázirge nátıjesiz. Sol sebepti de medıa resýrstarynyń kómegine júginip otyrmyn, – deıdi Bekbolat.

İnformburo.kz tilshisi 34 jábirlenýshimen baılanysyp, Arman Belasarovtyń olardan alaıaqtyqpen 441 400 AQSH dollary kólemindegi qarjylaryn jymqyrǵany jaıly estip bildi.

Belasarov Arman degen kim?

Arman Rashıduly Belasarov 1987 jyly týǵan. Ol – OQO (qazirgi – Túrkistan oblysy), Ordabasy aýdany Temirlan aýylynyń jergilikti turǵyny. Biraq sońǵy 8 jyldan beri AQSH-ta turady.

Ol Gýmılev atyndaǵy Eýrazıa Ulttyq Ýnıversıtetinde "Týrızm menedjmenti" mamandyǵy boıynsha 2006-2010 jyldary bilim alǵan. Oqýdy támamdaǵannan keıin AQSH-qa attanyp, sol jaqta qalyp qoıady.

Aldaýdy dostarynan bastaǵan

Armanǵa aldanǵandardyń ishinde ony stýdenttik kezden tanıtyn, jataqhanada birge turǵan dostary bar. Ol AQSH-qa barǵannan keıin arzan baǵamen kólik jetkizip beremin dep Qazaqstandaǵy dostaryn qyzyqtyrǵan. Arman tipti aqshasy joqtarynyń ózderin nesıe alýǵa kóndirgen.

Ol kezde ustalǵan kólikterdi ımporttaýdaǵy qujat rásimdeýge búgingideı qarjy ketpeıtin. Mysaly, 2011 jyldyń 1 shildesine deıin ımporttalǵan kólikti rásimdeýge motor qýatynyń ár tekshe santımetrine 0,6 eýro tóleý mindettelse, jańa tarıf 4 eýroǵa deıin ósti. Sondyqtan Armannyń usynysyn dostary qýana qabyldaǵan.

Dostıardyń aıtýynsha, Armannyń ózi Nú-Iorkte qyrǵyzdarǵa aldanyp qalǵanyn, aqshany qaıtara almaıtynyn aıtyp aqtalǵan. Dostıar aqshasyn áli kúnge deıin surap júr. Al Arman kólikpen tasymaldaý qyzmetin usynatyn kompanıa quryp, jaǵdaıyn jaqsartyp alǵanymen, dosyna aqsha joq deýmen keledi.

Arman Astanada ýnıversıtettegi oqýdan keıin birge páter jaldap turǵan dosyn da $50 000-ǵa túsiredi. Olar AQSH-tan Qazaqstanǵa kólikterdi ımporttap, alyp satýmen aınalyspaq bolady. Biraq Arman joǵaryda kórsetilgen somany alǵannan keıin habarsyz ketken.

"Bolashaq" baǵdarlamasymen AQSH-ta bilim alǵan eki otandasymyz da Armannyń osy quryǵyna ilingen. Aıat jáne Shoqan esimdi jigitter Nú-Iork qalasynda til kýrsyn oqyp júrgende Armanmen birge páter jaldap turypty.

– Arman Qazaqstanǵa kólik jiberip jatqanyn jıi aıtatyn. Bizdi de kóndirdi. Men Astanadaǵy aǵammen aqyldasyp, eki kólik satyp alaıyq dep sheshtik. Aǵama Porshe Cayenne ($25 150), al maǵan – Lexus RX350 ($24 000) tańdadyq, – deıdi Aıat.

Shoqan Armanǵa qolma-qol 13 000 AQSH dollaryn sanap bergen. Ol 2009 jylǵy Toyota Camry kóligin alýǵa tapsyrys beredi. Biraq kóligin sol kúıi ala almaǵan. Ekeýi de Armanǵa sengen. Sebebi ol bes ýaqyt namaz oqyp, tek durys áreketter jaıly aıtatyn bolǵan eken.

"Eki aptadan keıin kólik esigińizdiń aldynda turady"

Astana qalasy Polısıa basqarmasynyń bergen resmı málimdemesine oraı, Arman Belasarov 2011 jyldyń 11 qazan kúni Astana qalasy Almaty aýdandyq sotynda syrttaı sottalady. Al 2012 jyldyń 5 qańtarynan sot sheshimi zań kúshine enedi. Biraq boryshkerdiń aqshasyn onyń Qazaqstandaǵy otbasynan óndirý múmkin bolmapty. Sondyqtan 2013 jyldyń 24 qyrkúıeginde Arman Belasarovqa İshki ister mınıstrligi halyqaralyq izdeý jarıalady.

– Arman meniń týysymmen birge oqydy. Stýdent kezinde ol úıge jıi keletin. Sálemi túzý, qarym-qatynasqa jaqsy edi. Sondyqtan oǵan senip, aqsha jiberdim. Óziniń AQSH-qa barǵanyna 4 aı bolsa da, Qazaqstanǵa 50 kólik jiberip úlgergenin aıtqanyna ılandym. Naqtylap suraǵanymda, ol Qazaqstandaǵy úlken bıznesmendermen jumys istep jatqanyn aıtyp, eki aptada kólik esigimniń aldynda turatynyna ýáde berdi, – deıdi esimin jarıalamaýdy suraǵan joǵary laýazymdy sheneýnik.

Armannyń isin sotqa deıin jetkizgen osy – azamat. Qazir onyń isi QR Bas Prokýratýrasynda qaıta kóterilgen. Informburo.kz resmı suranys hatyna Astana qalasy prokýrorynyń birinshi orynbasary B.Ábilov tergeý áreketterin júrgizip jatqandaryn, qylmystyq is boıynsha túpkilikti sheshim qabyldanǵannan keıin ǵana jarıalaıtyndaryn málimdedi.

Ótken jyly sheneýnikke Armannyń advokaty habarlasyp, aqsha usynǵan. Biraq usynylǵan soma 2012 jyldaǵy valúta qunyna saı kelmeıtindikten, sheneýnik kelispegen.

Almatylyq Armanmen bıznes ashyp, taqyrǵa otyrdy

Shalqar esimdi almatylyq AQSH-ta bıznes ashýdy erterekten oılap júrgen eken. Ol 2014 jyly Seıit esimdi dosy arqyly Armanmen tanysady. Az ýaqytta ekeýi logıstıkalyq kompanıa qurady.

– Men trak (aýyr júk kóligi – red.) bıznesine $100 000 saldym. AQSH-qa týrısik vızamen barǵandyqtan, kompanıa men banktegi esepshottar Armannyń atynda boldy. Onymen az ýaqyt ǵana tanys bolsam da, sol kezde maǵan odan asqan senimdi adam joq sıaqty kórinetin. Biraq úsh aı jumysymyzǵa aýdıt júrgizip, aqshanyń jymqyrylǵanyn anyqtadym, – deıdi Shalqar informburo.kz tilshisine.

Arman men Shalqardyń birigip ashqan kompanıasy Astana Truck Lines Inc. dep ataldy. Shalqar Armannyń kompanıa tabysyn enshilep jatqanyn bilgen soń, kompanıa esepshotyndaǵy aqshany sheship alýǵa tyrysady. Biraq Arman esepshotty bıznes seriktesi kire almaıtyndaı etip ózgertip tastapty.

– Kompanıaǵa negizgi ınvestısıany men quıǵannan keıin, aqshamdy óndirip alýym kerek edi. Sol úshin kompanıa men kólik qujattaryn Armannan tartyp aldym. Biraq kóp ótpeı Federaldy tergeý búrosynyń qyzmetkerleri kelip, qujattardy tárkiledi. AQSH-ta Qazaqstandaǵydaı qoqan-loqy jasaý arqyly másele sheshilmeıdi eken. Men tek sotqa berý arqyly aqshamdy óndire alamyn. Biraq sottasý prosesi birneshe jylǵa deıin sozylýy múmkin, – deıdi Shalqar.

Shalqar vıza shekteýine oraı Qazaqstanǵa qaıtyp oralady. Ol sodan keıin 3 ret vızaǵa ótinish berip, ala almaǵan. Armanǵa jumys istegen qazaqtardyń biri onyń Chıkagoda US Express Trucking LLC atty kompanıasy da bolǵanyn aıtady.

Óz áıelin de aldaǵan

Jábirlenýshilermen suhbattasý barysynda, Armannyń óziniń burynǵy áıelin de qomaqty qarjyǵa aldap ketkeni belgili boldy. İnformburo.kz tilshisi Móldirdiń (esimi ózgertildi) baılanys nómirin taýyp, mán-jaıǵa qanyǵýǵa tyrysty. Biraq Móldir eshteńe aıtqysy kelmedi. Biraq, Arman men onyń burynǵy áıeliniń arasyndaǵy jaǵdaımen jaqsy tanys amerıkalyq qazaq bárin ashyq aıtyp berdi. Tek óz esimin jarıalamaýdy surady.

– Olar AQSH-ta úılendi. Móldir AQSH ýnıversıtetteriniń birinde MBA oqýǵa kelgen bolatyn. Otbasyn qurǵannan keıin, osynda qalmaq bolyp sheshken. Kóp ótpeı tuńǵyshy da dúnıege keldi. Basynda bári oıdaǵydaı bolatyn. Biraq keıinnen Armannyń adamdardy aldaı bastaǵanyn Móldir jaqtyrmady. Móldirdiń óziniń oqýǵa alyp kelgen $93 myń qarjysy bolǵan. Arman sony bızneske quıýǵa kóndiredi. Sosyn otbasynyń berekesi qashyp, ajyrasyp ketedi. Al aqshany qaıtarý úshin Móldir Armanmen 4 jyl sottasty. Jaqynda sotta jeńip shyqty, – deıdi ol.

Málimet bergen otandasymyzdyń aıtýynsha, Arman sot sheshimine deıin balasyna alıment te tólemegen. Biraq sot mindettegennen keıin amalsyz endi tóleı bastaǵan.

"Qazaqtyń bıznesine qazaq kómektespese ..."

Alysqa qatynaıtyn júk kóligin júrgizetin Nurlan esimdi qazaq ta informburo.kz tilshisine óz oqıǵasymen bólisti. Ol AQSH-qa kelgeli Nú-Iork qalasyna, jaqyn shtattarǵa júk tasymaldaýmen aınalysyp keledi. Bir kúni oǵan Arman habarlasyp, Astana Truck Lines kompanıasyna jumys isteýdi usynady.

– Arman "qazaqpyz ǵoı, bir-birimizge kómekteseıik" dep, maǵan kóbirek jalaqy usyndy. Basynda turaqty jumys emes shyǵar dep kelise qoımadym. Biraq onyń adamdardy sendire bilý qabileti bar. Kóp ótpeı, onyń kompanıasynda jumys isteı bastadym. Alǵashqy 1-2 aı ýaqtyly jalaqymdy alyp otyrdym. Sosyn apta saıyn túsetin aqsha keshige bastady. Janarmaı quıýǵa bergen bıznes kartadaǵy aqsha da taýsylyp, Arman óz aqshańnan tóleı tur dep surady. Oǵan da kelistim. Sońynan kólikti bermeı qoıyp, aqshany talap ettim, – deıdi Nurlan.

Arman kólik qajet ekenin aıtyp, aqshany bir aptada qaıtarýǵa ýáde beredi. Sosyn ol qolhat ta jazyp beredi. Biraq sodan keıin Nurlan Armandy kórmepti. Nurlannyń aıtýynsha, Arman oǵan $3000 qaryz bolǵan.

Al Alıhan esimdi taǵy bir júk kóliginiń júrgizýshisi Armanda $9000 aqshasy qalyp qoıǵanyn aıtady. Biraq Armannyń burynǵy áıeli Móldir ádiletsizdiktiń kýási bolǵandyqtan, Alıhanǵa Armannyń kóligin qujattarymen berip jibergen. Alıhan ony satyp, az da bolsa aqshasyn qaıtaryp alǵan.

Alıhannyń aıtýynsha, onymen birge 3 ózbek jáne 1 grýzın de Armanǵa jumys istegen. Olardyń árqaısysy kem degende 3000 AQSH dollarynan tabysyn ala almaǵan.

"Armannyń nekesiz taǵy bir balasy bar"

Jábirlenýshilerdiń biri Armannyń qyzqumar ekenin aıtady. Ol AQSH-qa Work and Travel baǵdarlamasymen keletin stýdent qyzdardy áleýmettik jeliler arqyly taýyp, tanysady eken.

– Arman ózin Nú-Iorktegi qazaq mıllıoneri etip tanystyrady. Ol meniń bir dos qyzyma 500 kóligi bar ekenin aıtqan. Al, shyn máninde, kólikteriniń sany 10-ǵa jetpeıdi. Sóıtip, ol esh tájirıbesi joq, sengish stýdentterdi áýejaıdan sýbýrbanmen (Chevrolet Suburban Large SUV – red.) kútip alyp, gúl syılaıdy. Nú-Iork qalasyn kórsetip, óz maqsatynda paıdalanǵysy keledi, – deıdi jábirlenýshi.

Onyń aıtýynsha, Armannyń nekesiz bir balasy bar. Informburo.kz tilshisi bul derektiń ras ne ótirigin anyqtaý úshin Nú-Iorkte turatyn belsendi otandastyrymyz ben Qazaqstannyń Nú-Iorktegi Bas Konsýldyǵynan aqparat surastyrdy. Kóp ótpeı, redaksıa tilshisi Armannan týǵan balasyn oǵan moıyndatqyza almaǵan qazaqstandyqpen baılanysý múmkindigin aldy. Biraq jábirlenýshi tilshimen sóılesýden bas tartty.

Bul málimetti bergen amerıkalyq qazaqtyń aıtýynsha, Arman tájirıbeli advokat jaldap, "aryz jazsań, Qazaqstanǵa deportasıa jasatyp jiberem" dep ózinen bala kótergen qyzdy bopsalaǵan-mys. Redaksıaǵa kelip túsken málimetke oraı, ol qyz qazir nekesiz týǵan balasyn jalǵyz ózi tárbıelep júr.

Tanymal adamdardyń abyroıyn óz maqsatynda paıdalanǵysy keledi

Arman Belasarov áleýmettik jelilerde óte belsendi. Ol Feısbýk jáne Instagram (100 myńnan astam tirkelýshisi bar) jelilerinde óziniń jetistikteri men kólik bıznesin jarnamalaıdy. Al Nú-Iorkke is-saparmen nemese demalyspen keletin Qazaqstan shoý-bıznesi ókilderi men joǵary laýazymdy sheneýnikterdi kútip alyp, olarmen baılanys ornatýǵa tyrysady.

Mysaly, Arman Qaırat Nurtastyń anasy Gúlzıra Aıdarbekovany, tanymal ánshi Ǵalymjan Moldanazardy, belgili rejıser Nurtas Adambaıdy, Ǵ.Músirepov atyndaǵy balalar jáne jasóspirimder teatrynyń dırektory Sábıt Ábdiqalyqovty, akter Artýr Tólepovty, tanymal qazaqstandyq vaıner Nurlan Batyrovty jáne taǵy basqa esimin jarıalamaýdy suraǵan sheneýnikterdi áýejaıdan kútip alyp, olarǵa joǵary deńgeıde qyzmet kórsetken. Nurlannyń aıtýynsha, Arman osy jolmen óz abyroıyn aqtap alǵysy keledi.

Shymkenttikter Armandy Chıkagoǵa deıin izdep barǵan

Keıbir otandastarymyz Armannan aqshany basqa jolmen óndirýdi oılastyrǵan. Chıkagodaǵy qazaqstandyqtar qaýymdastyǵynyń belsendisi Vasılıı informburo.kz tilshisine Shymkentten birneshe jigittiń Armandy izdep kelgenin aıtty. Vasılıı Armannyń áli kúnge deıin jaza almaǵanyna tańdanyp, ony izdep barǵan azamattardyń baılanys nómirin berdi. Ókinishke qaraı, shymkenttik jigitter informburo.kz jýrnalısik zertteýine kómek berýden bas tartty.

Vasılııdiń aıtýynsha, osyndaǵy jergilikti qazaqtar Armandy aıap, Chıkagoǵa izdep kelgen shymkenttikterge mekenjaıyn bermegen eken. Sebebi sol jyly Armannyń tuńǵyshy týylǵan bolatyn.

Jýrnalısik zertteý barysynda túrik tekti amerıkalyqtyń da Armanǵa aldanyp qalǵany anyqtaldy. Jábirlenýshi Sergat Ozchan Armanmen Brýklındegi Fatih Camii meshitinde tanysqan.

– Namaz oqyp bolǵannan keıin bir jigit menimen sóılese ketti. Ol óziniń jaǵdaıynyń joqtyǵyn, jumyssyz júrgenin aıtyp, kómek suraǵan. Meniń janym ashyp, baratyn jeri bolmasa osy meshitte qona ber dedi. Sebebi meniń ákem – osy meshittiń ımamy edi, – deıdi Sergat informburo.kz tilshisine.

Túrik tekti amerıkalyq Armannyń qolynan ne keletinin suraǵanda, ol Qazaqstanda kólik satýmen aınalysqanyn jetkizgen. Al Sergat ákesiniń Toyota Corolla Universal kóligin satýdy josparlap júrgen bolatyn. Osylaı Armanǵa jany ashyǵan Sergat kóliktiń qujattaryn berip, satyp berýdi usynady.

– Ol meshitte kómek suraǵannan keıin shynymen jaǵdaıy qıyn dep oıladym. Sodan kólikti bergenim týraly esh qujat jasaspadyq. Musylman musylmanǵa sengendeı, júre berdik, – deıdi Sergat.

Alaıda osy oqıǵadan keıin Arman joǵalyp ketken. Kóliktiń ózi de, aqsha da joq. Al kóliktiń sol kezdegi quny (orta eseppen) $20 000 bolǵan eken.

Armannyń qazirgi bıznesi qaryndasynyń atynda

Qazirgi tańda Arman Nú-Djersı shtatynyń Fort Lı qalasynda turady jáne sońǵy birneshe jyldan beri yńǵaıly kóliktermen tasymaldaý salasynda jumys isteıdi. Onyń KZ Limo NYC (Inc.) kompanıasy bar. Biraq kompanıa onyń qaryndasy Alıda Omarbaevanyń (Arnur Omarbaev esimdi Semeıden kóshken amerıkalyq qazaqqa turmysqa shyqqanǵa deıin tegi Belasarova bolǵan) atyna ashylǵan.

Ýnıversıtette Arman Belasarovtan bir kýrs joǵary oqyǵan Janat esimdi jigit AQSH-qa alǵash ret 2016 jyly barady. Ol Armannan kólik jalǵa alyp, Via (Uber analogy) onlaın tasymaldaý qyzmetiniń kómegimen taksıst bolyp isteıdi. Janat Qazaqstanǵa qaıtqan kezde, Arman oǵan 1000 AQSH dollary kólemindegi aqysyn berip úlgermeıdi.

– Men Armannyń Via akkaýntyn qoldaný arqyly jumys istedim. Sondyqtan tapqan aqshamnyń barlyǵy Armannyń esepshotyna túsetin. Kelisim boıynsha, ol meniń aqymdy apta saıyn tólep turýy tıis bolatyn. Biraq aqshany tóleýdi ol únemi keshiktiretin. Qazaqstanǵa qaıtqannan keıin ol BUU-ǵa Saýd Arabıasynan delegasıa kele jatqanyn, solarǵa qyzmet kórsetip kúnine $500 tabýǵa bolatynyn aıtyp, meni qaıta shaqyrdy. Sodan osy jyly jazda AQSH-qa qaıta baryp, oǵan jumys isteı bastadym, – deıdi Janat.

Elge qaıtýyna 2 aı qalǵanda Janat Armannan eseptesýdi suraıdy. Biraq Arman qaryndasyna, al qaryndasy Armanǵa siltep júre beredi. Odan bólek, Arman Janattan Nú-Iorktegi shymkenttik polısıa qyzmetkeri, kásibı boksshy Dımash Nıazovtyń Gavaııadaǵy toıyna barýǵa qarjy qajet dep taǵy $2000 suraǵan. Arman aqshany áreń degende eki aptada onlaın aýdarym arqyly jiberip, az ýaqytta aýdarylǵan 2000 AQSH dollaryn bank arqyly qaıtaryp (return item) alady. Sóıtip Janat óz aqshasynan aırylyp, qur alaqan qalady.

Redaksıa tilshisimen sóılesken jábirlenýshilerdiń basym bóligi – Janat sıaqty aldanyp qalǵandar. Olar da Armannyń sózine senip, onyń kompanıasyna jumys istegen. Keıinnen aqshalaryn ala almaǵan. Arman olarǵa kóliktiń bir jeriniń buzylǵanyn nemese kólik atyna aıyppuldar bar ekenin aıtyp, aılyqtarynan alyp otyrady. Al qalǵan somany "erteń beremin" deýmen keledi.

Armannyń qazirgi statýsy qandaı?

Arman Belasarov o bastan AQSH-ta qalýdy josparlaǵany belgili bolyp otyr. Ol Nú-Iorkke jetkennen AQSH úkimetinen saıası pana suraǵan. Ol úshin Armanǵa Qazaqstanda oppozısıoner bolǵanyn dáleldeý kerek bolady. İnformburo.kz redaksıasyna Armannyń AQSH-tyń Azamattyq jáne Imıgrasıa qyzmetine (United States Citizenship and Immigration Services) jibergen qujaty kelip tústi.

Qujatta Arman "El Bolashaǵy" qozǵalysynyń Astanadaǵy jastar qaýymdastyǵynyń jetekshisi bolǵanyn jazady. Stýdenttik jyldary únemi opozısıalyq mıtıńilerge shyǵyp, birneshe ret quqyq qorǵaý qyzmetkerleri ony sabapty. Al sońǵy jyldary Ulttyq qaýipsizdik komıtetiniń qyzmetkerleri tarapynan qysym kórgenin, elden ketýine týra kelgenin jazady. Onyń stýdent kezindegi belsendiligi týraly naqty málimetti jınaý úshin onymen birge oqyǵan kýrstastarymen baılanystyq.

– Arman sabaqtan jıi qalatyn. Ol ýnıversıtette júrgende belsendi stýdent bolmaǵan. Aryz jazǵysh, óte sarań edi, – deıdi Armannyń ýnıversıtettegi kýrstasy (esimin kórsetpeýdi ótindi).

Sondaı-aq, qujatta "El bolashaǵy" qozǵalysynyń Astana qalasyndaǵy belsendi jastarynyń 2006 jyly 10 qarashada jıyny ótkeni jaıly jazylady. Jıynǵa 45 adam qatysyp, bir aýyzdan Arman Belasarovty qozǵalystyń Astana qalasyndaǵy jastar qaýymdastyǵynyń jetekshisi etip saılaıdy. İnformburo.kz tilshisi jıyn hattamasynda esimi keltirilgen azamattardy taýyp, surastyrǵanda olar ondaı jıynnyń bolmaǵanyn aıtty.

Arman AQSH-qa barmaı turyp, Astanadaǵy №3 qalalyq emhanadan soqqyǵa jyǵylǵanyn dáleldeıtin denesindegi kógergen jerleri týraly anyqtama alǵan. İnformburo.kz tilshisi bul aqparatty da anyqtaýǵa tyrysty. Emhana basshylyǵy bul málimetti joqqa shyǵardy. Armannyń kýrstastary da onyń eshqashan polısıaǵa tutqyndalmaǵanyn, eshqandaı soqqyǵa jyǵylmaǵanyn aıtady. Arman Belasarov Astanada oqý kezinde tek saýdamen aınalysyp, qosymsha tabys kózin izdeýmen júrgen.

AQSH-qa ketkennen keıin, Armannyń týysqandary OQO Polısıa basqarmasy tarapynan qysym kórip, ýaqytsha tutqyndalǵanyn rastaıtyn jalǵan qujattar daıyndaýǵa kómektesedi. Al Arman Belasarovtyń AQSH-tan saıası pana alýǵa usynylǵan qujattarynyń jalǵan ekenin onyń burynǵy áıeli aıtyp, isti keıinge qaldyrýǵa sebepshi bolady. Bul týraly Armannyń óz aýzynan estigen azamat informburo.kz tilshisine aıtyp berdi.

Jetkilikti deńgeıde málimet jınap bolǵan soń Armannyń ózine baılanysýǵa tyrystyq. Biraq ol informburo.kz tilshisiniń habarlamasyna jaýap bermedi.

İnformburo.kz redaksıasy Arman Belasarov isine qatysty tergeý áreketterine kómek berýge daıyn ekenin bildiredi. Redaksıa tilshisi jeke sóılesken árbir jábirlenýshi men aqparat berýshiden jınalǵan derekterdi olardyń ruqsatymen Qazaqstan Respýblıkasy İshki ister mınıstrligi men Bas Prokýratýrasyndaǵy Arman Belasarovqa qatysty qylmystyq iske jaýapty mamandarǵa bere alady.

Joldas Órisbaı