«Nur Otan» partıasynyń memlekettik tildegi #NurOtanPikir jańa pikirtalas alańy óz jumysyn bastady. Tusaýkeser otyrys «Táýelsizdigimizdiń rýhanı negizderi» taqyrybyna arnalyp, onda eldiktiń tirekteri, ulttyq mádenıet pen rýhanıattyń jáne memlekettik tildiń damýy sıaqty ózekti máseleler talqylandy. İs-sharaǵa «Nur Otan» partıasy Tóraǵasynyń Birinshi orynbasary Máýlen Áshimbaev, Parlament Májilisiniń depýtaty Nurtaı Sabılánov, belgili saıasattanýshy Aıdos Sarym, «Kıeli Qazaqstan» ǵylymı-zertteý ortalyǵynyń basshysy Berik Ábdiǵalıuly jáne Garvard ýnıversıtetiniń túlegi, qoǵam qaıratkeri Shyńǵys Muqan qatysty. Otyrysty ǵalym, Halyqaralyq Túrki akademıasynyń prezıdenti, «Egemen Qazaqstan» respýblıkalyq gazeti» AQ-nyń Basqarma tóraǵasy Darhan Qydyráli júrgizdi.

Qazirgi tańda «Nur Otan» partıasy óz qyzmetin jańǵyrtý jolynda birqatar tyń bastamalardy qolǵa alyp, júıeli jumys istep kele jatqany belgili. Sonyń nátıjesinde kóptegen ıgi ister júzege asyrylyp jatyr. Partıa tarapynan ózekti máselelerdi talqylap, olardyń oń sheshilýine yqpalyn tıgizetin alańdar qolǵa alyna bastady. Qazirdiń ózinde partıanyń #NurOtanTrends jáne #NurOtanTalks degen pikirtalas alańdary turaqty túrde jumys istep tur. Ol jerlerde negizinen ekonomıkalyq, saıası taqyryptar, strategıalyq bastamalardy júzege asyrý joldary, jańa bastamalardyń tıimdiligi sıaqty ózekti máseleler talqylanady.

Al jumysy jańadan bastalyp jatqan #NurOtanPikir klýbynda halqymyzdyń rýhanı qundylyqtaryn dáripteý, tarıhı sanany jańǵyrtý, sol arqyly ulttyń sanasyn oıatý, memlekettik til men mádenıetimizdi odan ári damytý, táýelsizdigimizdi nyǵaıtý sıaqty ulttyq máseleler talqylanatyn bolady. Sol sebepti de bul alańnyń jumysy tek qazaq tilinde júrgiziledi. Sondaı-aq qazaqtildi ortada jıi kóterilip júrgen máselelerge qoǵamnyń nazaryn aýdarý da jańa pikirtalas alańynyń negizgi mindetteri bolyp sanalady.

Otyrysta alǵash bolyp sóz alǵan «Nur Otan» partıasy Tóraǵasynyń Birinshi orynbasary Máýlen Áshimbaev bul bastamanyń maqsaty qazaqstandyq qoǵamdy tolǵandyryp júrgen ózekti rýhanı máselelerdi zamanaýı formatta talqylap, olardy sheshýdiń tıimdi joldaryn qarastyrý ekenin aıtty. Sondaı-aq ol qatysýshylardy Táýelsizdik merekesimen quttyqtap, bul kúnniń ultymyz úshin mańyzdylyǵyn atap ótti.

– Biz búgingi zaman formatynda halqymyzdyń rýhanı qundylyqtaryn dáripteý, Táýelsizdigimizdi nyǵaıtý men ulttyq kodymyzdy saqtap qalý sıaqty mańyzdy máselelerdi talqylaý úshin osyndaı jobany qolǵa aldyq. Bul baǵytta «Nur Otan» partıasy kóp jumystar atqaryp jatyr. Biz bul máselelerdi talqylap qana qoımaı, naqty nátıje berip jatqan birneshe jobalardy júzege asyrýdamyz, – dedi Máýlen Áshimbaev.

«Nur Otan» partıasy Tóraǵasynyń Birinshi orynbasary jastardyń boıynda qundylyqtar júıesi men tarıhı sanany qalyptastyrý qajet ekenine toqtalyp, barlyq qazaqstandyqtardy elimizdiń eń basty merekesi – Táýelsizdik kúnin toılaýǵa óz úlesterin qosýǵa shaqyrdy. Sondaı-aq Máýlen Áshimbaev táýelsizdikti saqtap, qoǵamda durys qundylyqtardy qalyptastyrý isine de kóńil bóldi.

Jalpy alǵanda birinshi kezdesý Memleket basshysynyń «Uly Dalanyń jeti qyry» maqalasynda baıandalǵan strategıalyq maqsattardy iske asyrý múmkindigine arnaldy. Pikirtalasqa qatysqan Parlament Májilisiniń depýtaty Nurtaı Sabılánov ózekti máselelerdi qozǵaıtyn osyndaı alańnyń mańyzdylyǵyn atap ótti. Depýtat qatysýshylardy jastarǵa Táýelsizdikke qol jetkizýimizdiń mańyzdylyǵyn tereńirek túsindirýge shaqyrdy.

Tarıhshy, saıasattanýshy, «Kıeli Qazaqstan» ǵylymı-zertteý ortalyǵynyń basshysy Berik Ábdiǵalıuly búgingi zaman jastarynyń qoǵamdyqtan góri jeke bastarynyń múddelerine qatty kóńil bóletinin aıtty. Ol tarıhı sanany qalyptastyrý, ishki týrızmdi damytý men Qazaqstannyń kıeli jerlerin qasterleýdi úıretý  arqyly qalyptasqan ahýaldy ózgertý qajet dep esepteıdi.

Saıasattanýshy, qoǵam qaıratkeri Aıdos Sarym tarıhqa ótken kúnderdiń jylnamasy men naqty ataqty tulǵalardyń ómir baıany arqyly ǵana qaramaı, ony sanany qalyptastyrýdaǵy myqty mehanızmge aınaldyrýdy usyndy.

Qoǵam qaıratkeri, Garvard ýnıversıtetiniń túlegi Shyńǵys Muqan bolsa, jastardyń arasynda jurttyń bárine túsinikti qarapaıym tilde mańyzdy ıdeologıalyq máseleler tóńireginde aqparattyq jumys júrgizý kerek ekenin tilge tıek etti. Onyń aıtýynsha, kez-kelgen memlekettik jáne ıdeologıaǵa jaýapty qyzmetker maqsatty aýdıtorıa úshin búgingi zaman úlgisinde mańyzdy máselelerdi durys jetkize bilýi tıis.

Kezdesýge qatysýshylar Memleket basshysynyń «Bolashaqqa baǵdar: rýhanı jańǵyrý» jáne «Uly dalanyń jeti qyry» baǵdarlamalyq maqalalarynyń elimizdi rýhanı jańǵyrtýdaǵy temirqazyq nysana bolyp tabyp tabylatynyn aıtty. «Rýhanı jańǵyrý» sheńberinde júzege asyrylǵan jobalar óziniń mańyzdylyǵy men tıimdiligin kórsetti. Al, jańa maqala rýhanı jańǵyrý úderisiniń qısyndy jalǵasy bolyp tabylady.

Aıta keteıik, #NurOtanPikir alańynyń otyrysy partıanyń joǵaryda atalǵan ózge de pikirtalas klýbtarynyń jıyny sıaqty Facebook áleýmettik jelisinde tikeleı efırden kórsetildi.