Almatyda orta bilim beretin mekemelerdiń 100-den astam muǵalimderi qatysqan «Ustaz Mártebesi – Ult Mereıi» qalalyq konkýrsynyń qorytyndysy shyǵaryldy.

№159 mekteptiń qazaq tili men ádebıeti pániniń muǵalimi Sáýle Ahmetova Almatynyń «Úzdik muǵalimi» atandy, oǵan jańadan ashylǵan №168 mektepte saltanatty túrde avtomobıldiń kilti tapsyryldy. №140 mekteptiń ınformatıka pániniń muǵalimi Nurǵaly Nurymbetovke otbasylyq demalystyń joldamasy berildi. Bulardan ózge birqatar ustazdarǵa dıplomdar men 500 jáne 300 myń iri teńgelik sertıfıkattar tabys etildi. Ustazdar arasynda mundaı baıqaý ótkizýdiń bastamashysy- jergilikti kásipker Murat Ádilhanov, ol «Týǵan jer» baǵdarlamasy aıasynda osy oqý mekemesin salyp bergen edi.

«Memleket basshysynyń qoldaýy arqasynda Almatyda 117 oqý oryndary salyndy. Tek sońǵy bes jyl ishinde ǵana bilim salasyn qarjylandyrý megapolıste 37%-ǵa nemese 27 mlrd. teńgege ósti. Qazirgi kezde bilim salasynyń ınfraqurylymyn damytýǵa erekshe nazar aýdarylýda. Tek bıyldyń ózinde ǵana qurylys pen kúrdeli jóndeý jumystaryna 17 mlrd. teńgeden astam qarjy bólindi. Men sizderge barynsha jaýapty ári qıyn jumystaryńyz úshin alǵys aıtamyn. Ustazdardyń jumys sapasy oqýshylarynyń túrli baıqaýlarda jeńimpaz atanýymen jáne ózderińizdiń jeke kásibı biliktilikterińizben aıqyndalady», - dep atap ótti óziniń quttyqtaý sózinde Almaty ákimi Baýyrjan Baıbek.

Aıta keterligi, Memleket basshysynyń Joldaýyn júzege asyrý barysynda búdjet qarjysy esebinen qalada taǵy da 8 jańa mektep salynady.

Jyl basynan beri jańarǵan ádispen dáris berýge kóshken Almaty muǵalimderiniń 70%-ynyń jalaqysy 30%-ǵa ósti. Ulttyq testileýden ótken 1293 muǵalim 1 qyrkúıekten bastap alǵash ret ózderiniń qyzmettik jalaqysyna 30 dan 50%-ǵa deıin qosymsha ústeme alatyn bolady.

Budan ózge, memleket aǵylshyn tilinde sabaq beretin muǵalimderge qoldaý kórsetýde. Bıyl mine, ekinshi jyl fızıka, hımıa, bıologıa,ınformatıka pánderin aǵylshyn tilinde oqytatyn ustazdarǵa ózderiniń qyzmettik jalaqysynyń ústine 200%-dyq kólemde qosymsha aqy tólenedi.