Almaty ákimi Baýyrjan Baıbek «Nur Otan» partıasynyń jańarǵan qoǵamdyq qabyldaýynda azamattardy qabyldady. Megapolıs ákiminiń turǵyndarmen kezdesýi kezinde qoǵamdyq kólikti modernızasıalaý, jańa mektepter men joldar salý, qala bazarlaryn rekonstrýksıalaý máseleleri qaraldy.
Mysaly, úsh balanyń anasy Álıa Jalǵasbaeva qala basshysyna «Darhan» yqsham aýdanynda mektep salý qajettigin aıtty. Qazirgi kezde Alataý aýdanynda oqýshy ornynyń jetispeýshiligi aıqyn baıqalady. Óıtkeni, tek sońǵy úsh jyl ishinde ǵana munda oqýshy sany myńnan asyp ketken. Bul máseleni sheshý úshin Baýyrjan Baıbek myń oryndy mektep salýǵa qatysty jer telimin izdestirýdi jáne qajetti JSQ jasaýdy tapsyrdy.
«Qazirgi kezde salynyp jatqan turǵyn úılerdiń 70%-y jańa qosylǵan aýdandarǵa tıesili. Qajetti ınfraqurylym jasalýda, Indýstrıaldy aımaq damyp, jańa jumys oryndary ashylýda. Keler jyly jol jóndeýge qarjy bólinedi, jaryq kózderi ornatylady. «Darhan» yqsham aýdany týraly aıtar bolsaq, men bul problemany bilemin. Qalada bos jatqan jer telimderi joqtyń qasy, sonyń saldarynan jańa áleýmettik qurylys salý qıyndaýda. Men mektep salatyn jer ýchaskesin izdestirýdi, soǵan qatysty JSQ daıyndaýdy tapsyrdym. Jalpy, keler jyly biz 8 jańa mektep salatyn bolamyz», - dedi qala basshysy.
Óz kezeginde zaǵıptardyń «Kómektes» qoǵamdyq qorynyń basshysy Aleksandr Sapelkın qala basshysyna qoǵamdyq kólikterge baǵyttyń nómiri týraly daýystap habarlaıtyn qondyrǵy ornatý týraly usynys aıtty. Ol sonymen qatar Almatynyń Bostandyq aýdanynyń «Alataý» eldi mekenine jańa avtobýs baǵytyn ashýdy suardy.
«Jyl boıyna mynany jasaımyz, avtobýstardyń 100%-yna daýystap habarlaý qondyrǵysy ornatylady, jaqyn arada «Alataý» yqsham aýdanyna qatynaıtyn jańa baǵyt ashylatyn bolady. Jalpy, qoǵamdyq kólik salasynda problemalar óte kóp. Sondyqtan biz úlken kólik reformasyn júrgizip otyrmyz. Men ózim Gagarın-Ótepov kósheleriniń boıynda turdym. Kúnde tańerteńgisin oqýǵa, odan soń jattyǵýǵa baratynmyn, úıge jıi kesh oralatynmyn. Keıde jaıaý júretinmin, óıtkeni, keshke qaraı avtobýstar júrmeıtin. Abylaı hannyń, odan soń Abaıdyń, Jeltoqsan men Tımırázevtyń boıymen Ótepov kóshesine deıin jaıaý júretin edim. Men eski avtobýstardy jaqsy bilemin, ishi lyq toly bolatyn, beketterge toqtamaıtyn, daýystap habarlaý degen túske enetin. Eki jyl ishinde biz tasymaldaýshylardyń barlyq kóleńkeli ekonomıkasyn sytrqa shyǵardyq, tıisti ınfraqurylymdy jasadyq. 600-den astam jańa avtobýstar aldyq. Mamyrǵa deıin taǵy 716 jańa avtobýs satyp alý josparlanǵan. Biz qazir adamdardyń avtobýs beketterinde uzaq turyp qalmaýlary, qoǵamdyq kóliktiń der kezinde kelýi ári túnge deıin júrýi, júrgizýshilerdiń baısaldy bolýy úshin naqtyly jumystardy atqarýdamyz. Búgingi kúni jaıaý júrginshilerge de jaıly jaǵdaılar jasalýda, bala arbasyn jetektegen analar, ata-analar, múgedekter men velosıpedshiler esh kedergisiz júrýde», - dedi ol.
Qala turǵyndarymen kezdesý kezinde Baýyrjan Baıbek «Arystan» bazaryn modernızasıalaýǵa jáne «Kók qaınar» yqsham aýdanynda jańa jol salýǵa ýáde etti. Budan ózge, partıanyń qoǵamdyq qabyldaýyna «Skybar» túngi klýbynyń qoǵamdyq tártipti jıi buzatyndyǵy týraly kóptegen shaǵym túsýi saldarynan atalǵan túngi klýbqa keshendi tekserý júrgiziletin bolady.
